سالگردها

Köln 2014آلمانيا نين كؤلن شهري، 21 آذرين 69-جي ايلدؤنومو موناسيبتيله كئچيريلن سئميناردا چيخيش­ين متني.

تريبون سايتندان چاغيريش: سئميناردا چيخيش ائتميش بوتون دوستلاردان، اؤز چيخيشلاري­نين متني­ني تريبون سايتندا نشر ائتمك اوچون بيزه يوللايين. این آدرس ایمیل توسط spambots حفاظت می شود. برای دیدن شما نیاز به جاوا اسکریپت دارید

ميللي حركاتين حاضيركي دالغاسي­نين عؤمرو اوچونجو اون ايل­لي­ييني ياشايير. تاريخي باخيمدان بو آز زاماندا، بو حركاتين گئنيشلنمه­سيني، يالنيز بير مؤعجزه­يه بنزه­تمك اولار. قيصا بير آناليز چرچيوه­سينده، بوتون تفروعاتا واريب، هامي فاكتلاري سادالامادان، سون ايللرده، بوگونكو دورمون فورمالاشماسينا تأثير قويان 4 موهوم عاميلي سايماق اولار. سياسي مكان باخيميندان بو 4 عاميل­ين بيري حركاتين وطندن كنار قولو داخيل اولماقلا حركاتين ايچينده، ايكينجي­سي ايران داخيلينده، اوچونجوسو بؤلگه­ده و دؤردونجوسو دونيا سياست چاپيندا باش وئرميشدير:

 

  1. بيرينجي عاميل داخيلي اينكيشاف يا ايچ گليشمه و سياسي يئتگينلشمه عاميلي­دير. ميللي حركات، ايلكين دؤرونو اوغورلا باشا وورسادا، ايكينجي دؤورونو باشلاماقدا چتنيليك چكير. ميللي حركات، ايلك دؤورده نه يي ايسته­ميريك حاقيندا شعر و شوعارلارلا ميللي هيجان ياراديب، گنجلر و توپلومون بوتون لايه­لريني مئيدانا چكمكده لياقتله عمل ائتميشديرسه، بو دؤرده اؤزونو تعريف ائتمك و حاكم ايدئولوژي­له اؤز كيم­لي­يي آراسيندا اولان كونتراستي قابارديردي.

    حركات اؤز دوغال گليشمه­سي ندنيندن، آرتيق يئني بير آشامايا داخيل اولمالي­دير. بو آشاما يئني فيكر و يئني كادرلار طلب ائدير. ايلك دؤرده نه­يي ايسته­ميريك نفي­يي سؤيلمي يئرينه، ايندي، ايستكلريميزي اثباتي پلاتفورملاردا بيان ائتمه­لي­ييك. بو سؤيلم، شعر يئرنه نثر، ميللي هيجان دالغالاري يئرينه سياسي شعور، باشيميزا گلميشلرين كدرلي اوصافي­نين بياني يا مذهبي تئرمينله دئسك، "ذيكري موصيبت" يئرينه صاباحا اومودو جواب يئرنه دوشونمه­يه وادار ائدن سوآلطلب ائدير.

    ميللي حركات، ايكينجي دؤورده، اؤزونون مركزيت باسقي­سي و داخيلده اولان تسليم طلب­لي­يه قارشي سينيرلاريني قاباردماق يئرينه، بوتون ميللتين دردينه واران، يالنيز ميللي مسئله و ميللي سيتم يوخ، سوسيال عدالت، قادين آزادليغي و برابر حاقلي­ليغي، اكولوژيني قوروما و اكونوميك گليشمك سورونلاري­نين چؤزوملريني ده، سياسي پلاتفورملار چرچيوه­سينده آرايا قويمالي­دير. بو دؤورده، يئني ميللي حركات اؤزونو يئني بير صاباح و يئني بير توپلوم قورماغا قادير اولان قوه كيمي تانيتمالي­دير و اؤزونو يالنيز ميللي حركات يوخ، بوتون ميللت قارشي­سيندا مسئول حيس ائتمه­لي و بوتون داورانيش كدرلاري­دا بو مسئوليت­دن ايره­لي گلمه­لي­دير. داها ميللتي يئرلي يا يئرسيز اساسلارلا بؤلوب، اؤزونو يالنيز عملي صالئح و ايماني كاميل اولانلارا نوماينده گؤروب او بيري­لري قيناماغا حاقلي اولمامالي­دير. اگر بيرينجي دؤروده هامي­نين حركاتين سيرالاريندا اولماسي­نيني حاقلي تانيماق شرط ايدي، ايكينجي دؤورده بوتون ميللت ائولادي­نين حتي ميللي حركاتين شوعارلاينا دستك وئرمه­ينلرين حاق و ايستكلري گوندمه گلمه­لي­دير. ايندي، ايلك دؤورن راديكالسيمي­نين يئريني پراقماتيسم و ايلكين هيجانلارين يئريني­ايسه، سياسي استراتژي آلمالي­دير. بو دؤرده، ميللي حركات اؤزونون وار اولماسيني ايثبات ائتمكله يوخ، اؤزونون نه يه قادير اولماسيني گؤسترمه­لي­دير. ميللي حركات، هله بيرينجي دؤورون باشا چاتماسي­ درك ائديب و ايكينجي دؤورون گونده­لي­يي­ني آرايا قويماقدا آخسايير.

  2. گونئي آذربايجانين بوگونكو سياسي دورومان تأثير قويان ايكينجي عاميل، ايران سياسي مكانيندا، شمسي 1388 جي ايلين ياشيل حركاتيلا باغلي دير. بللي اولدوغو كيمي همان حاديثه­لرده گونئي آذربايجان اؤز سؤزونو كناردا قالماقلا دئدي. بو مئساژ هم آيدين ايدي و هم ده ائله بير ديلده ديله گليردي كي، مئساژين موخاطبلري اونو در حال باشا دوشدولر. ميللي حركاتين بوتون گوج نوماييشلري قارشي­سيندا كار و كور رولو اويناماغا آليشميش فارس سياستچيلري درحال، نه كار و نه كور اولماديقلاريني گؤسترديلر. 1374-جي ايلين آذربايجاندا ايسلامي شورا سئچگي­لري، 1370-جي ايللرده آذربايجان اؤيرنجي حركاتي، يئني آذربايجان مطبوعاتي، بابك قالاسيندا كئچيريلن ميللي قورولتايلار، 2006 جي ايلين ماييس قيامي و سهند و باشقا استاديوملاردان سمالارا قالخان سسلري دويا بيلمه­ميشلر و دويماديقلاريني ايديعا ائتميشلر، بو سس­سيز سسي و سسلرين سسيني راحاتجاسينا دويدولار. اوسته­ليك، ياشيل حركاتين توتدوغو يؤن، آذربايجان مؤوقعي­نين حاقلي اولماسيني گؤستردي. بيزيم ايسته­ييميزدن آسيلي اولماياراق، ايندي ايران آدينا دانيشان فارس سياستچيلريني، آذربايجانين گله­جكده ده، موستقيل مؤوقع توتماسي قورخودا ساخلايير.

    خاتمي دؤورونده ايچريده و سونرا ديشاريدا، فارس ايصلاح طلب سياستچي و آيدينلاري هر ايمكانا ماليك اولاركن، بيزيم ميللي حركات، اؤيرنجي مطبوعاتي، اؤيرنجي حركاتي و بابك قالاسينداكي ميللي قورولتايلارينا قيناعت ائتمه­لي­ايدي. احمدي­نژادين ايلك پريزيدنت ليك دؤورونده، گونئي آذربايجان، بابك قالاسيندان شهرلره داها دقيق دئسك استاديوملارا حتي فارس شهرلرينده اولان ايدمان/ورزش ميدانلاريندان دانيشماغا و گوج نوماييش ائتديرمه­يه باشلادي. اؤنجه ايشاره اولونان كيمي، احمدي نژادين ايكينجي 4 ايل­لي­يي­نين باشلانيشيندا باشلانان ياشيل حركات دؤرونو، اؤز ايستيقلاليني و آذربايجان توپلومومون سياسي نبضيني الينده ساخلاماسيني موفقتيله نوماييش ائتديردي. فارس اوپوزيسيونو، باتي­دان هر بير يارديم گؤردويو ياشيل حركاتي دؤورونده، باتي قووه­لردن هئچ بير معنوي يا مادي يارديم گؤرمه­ين گونئي آذربايجان، باتي گميچيلري­نين سياستي­نين دئيشمه­سيندن بير دئپرسيون ياشامير.

    باشقا طرفدن باتي اؤلكه­لري­نين حيمايه­سيندن محروم و بو حيمايه­يه آليشماميش گونئي آذربايجان ميللي آزادليق حركاتي، باتي اؤلكه­لري­نين بؤلگه­ده پري­آريتتلري (ترجيحاتي)نين دئيشمه­سي نتيجه­سينده، روحدان دوشمه­ميشدير.

     

    ايران داخيلينده هله عرب بهاريندان اؤنجه باشلانيب مغلوب اولموش ياشل حركات و موحاسيبه­سيني، غرب و اسرائيلين ايرانا قارشي يوروددويو باسقي­لارلا تنطيمله­ميش فارس اوپوزيسيونو، ايكي جبهه­ده اوغورسوزلوقلار ياشاديلار. بوگون هم 1388-دن سونرا هر هانسي بير فورمادا اؤيرنجي حركاتي يا باتي­دان گلن معنوي و مادي دستك باخيميندان فارس اوپوزيسيونو، هله ده دوام ائدن و سونو گؤرسنمه­ين دئپرسيونا دوچار اولموش حالدادير.

  3. بيزيم آكتوئل دوروموموزا تأثير بوراخان اوچونجو عاميل، بؤلگه­سل حاديثه­لرين بوتون آوتوريتر رئژيملر و اوجومله دن ايران حاكميتي­نين خئيرينه فيرلانماسي­دير. مسئله بوردادير كي، حتي ديكتاتورالاردا، دؤولتلر يالنيز سياسي پليس، سياسي محبس و شكنجه آپاراتي دئيرلر. ائله ديكتاتورالاردا دا، موعاصير دولت آپاراتي، ائيتيم، بوتون اينفراستروكتورل سيستملري، صحيه و بير چوخ فونكسيونلاري يئرينه يئتيرير. ان باشليجاسي، اهالي­نين گوونلي­يي­ني قوروماق دؤولتين بوينونا دوشور. اگر يوز ايل اؤنجه، ائوينده قلينجي، آتي و آذوقه­سي اولان اهالي، لازيم گلنده دؤولتي قوروماغا سفربر اولوردو، موعاصير دؤولتده نه حرب ايشي ساوادسيز آت بئلينده گزن الي قلينجلي يا الينده برنو توفنگي اولانلاردان عيبارت دير و نه اهالي­نين ائوينده مطبخ پيچاغيندان سواي بيرسيلاح ساخلانيلير.


    بئله­ليكله ايستير اسگي سووئتلر اولسون، يا اسگي يوقوسلاوي يا اورتا دوغونون كانيبال ديكتاتورالاري، يالنيز روشورتخورلوق و سياسي ايختيناقي اياق اوسته ساخلاماقلا يوخ، هم ده سرحدلرين، ائولرين، مكتبلرين، وطنداشلارين و خسته­خانالارين تهلوكه­سيز­لي­ييني قوروماقلا مشغولدورلار. موعاصير دؤولتلرين، ظاهيرده بديهي اولان بو فونكسيالاريني بلكه بيلمه­ين يوخدور. آمما بيلمك و سياسي رفتاردا داخيل ائتمك باشقا بير مسئله­دير. ديكتاتورالاردا هامي ايقتيدار قارشي موخاليفتين هزينه­لي اولماسيني بيلير. آمما هامي بو هزينه ني اؤز سياسي سئچيمينده بير آغيرليقلا ديرلرنديرمير. بؤلگه­ميزده باش وئرن فاجيعه­لر، سومالي­دن، ميصير، ليبي، افغانيستان و ان اساسي عيراق و سوريه تجروبه­سي، بو ساده فاكتي ائله بير پداقوژيك و ائفكتيو فورمادا هامي­يا عيان ائتدي كي، صدام و اسد رئژيملري­نين "نعمت"لريني اونودانلار، بو حاقدا يئني­دن دوشونمه­لي اولدولار.

     

     

  4. دؤردونجو عاميل هر باخيمدان، بؤلگه­ميزده باش وئرنلرين دونيا سياستي­نه بورخدايغي ايزله باغلي­دير. ياشاديغيميز گلوبال دونيادا، يالنيز بيزيم بؤلگه يوخ، هم ده دونيا پليسي اولان آمئريكا بيرلشميش شتاتلاري و باتي گوجلري­ده بو خوشا گلمز فاكتلا حئسابلاشمالي اولموشلار. بونونلا، عرب بهاريني قارشيلايان دونيا و ايران حاقيندا آچيق آشكار رئژيم چئنج سياستي­ني گونده­ليكده قويموش قووه­لر، اورتا دوغو ديكتاتورلاري­نين چؤكمه­سيندن يارانمش قدرت واكومي (خلائي) نين ميدانا گتيردي­يي، ليبي كائوسوندا شوك دوشوب، جبهه­النصره و داعيش كيمي قووه­لرين قارشي­سيندا، تهران و دمشق رئژيملريني ان آزيندان دئفاكتو موتفيق حئساب ائتديلر.


     

    سونوج:

    حاقيندا دانيشيلان 4 عاميله بيرده نظرسالاق:

    بير: ميللي حركات اؤز يئني آشاماسينا (مرحله­سينه) داخيل اولماقدا استعداد و ايراده گؤسترمه­لي­دير.


    ايكي: ياشيل حركات جريانيندا اؤز موستقيل سياسي رفتاريني نوماييش ائتديرميش گونئي آذربايجانين اؤزونه اينامي آرتميش­ديرسا، ايران سياسي مكانيندا مركزچي طلبه حركاتي و ايصلاحاتچي­ليق پريشانليغا دوچار اولموش و يالنيز حسن روحاني­ني حاكميته گلمه­سيندن سونرا چوز آز بير سورع و اينامسيزليقلا اؤزونه گلمك ايستير.

    ايكي: ايران رئژيمي، ديكتاتورلارين قدرتدن گئتديكريندن دوغان خلاء اساسيندا، مئيدانا گلن قار قووه­لرين نه يه قادير اولاسيندان، ايسته­دي نتيجه­ني آليب و بو نتيجه­ني اينسانلارين سياسي سئچيملرينده رول اويناماسينا چاليشر و بو يولدا معين درجه­ده اوغور قازانميشدير. رئژيمين بو موفقيتي، گونئي آذربايجان­ين دا ضررينه عمل ائدير.

     

    دؤرد: دو نيا سياستينده، باتي اؤلكه­لرين بيزيم بؤلگه­ اوچون يئني­جه فورمالاشميش ترجيحاتي ايران رئژيمي­نين خئيرينه و بوتون موخاليفتين زيانينا اولسادا، فارس مركزچي اوپوزيسيونو بو فاكتوردان داها جيددي ضررلنميشدير.

    بو دؤرد عاميل هم بؤلگه و هم ايران و گونئي آذربايجانا تأثير قويور. گونئي آذربايجان ميللي آزادليق حركاتي نين، هر هانسي غيري دموكراتيك رئژيمين اوپوزيسيونو كيمي، چوخ محدود سئچيملري واردير. بو سببدن، ميللي حركات، زمانين و يئني دؤورون طلباتيلا اويقونلاشمالي، تاكتيلري و داخيلي دوروموندا معين رفورملار ائتمه­لي و بؤلگه­ده اولان دوروملا اويقون حركت ائتمه­لي­دير. بؤلگه­ده و ايراندا جيددي دئيشيكليكلر قاچيلمازدير و ميللي حركات، بو يئني لشن دونيادا، اؤزونو يئني گونئي آذربايجانين عقلاني سسي و لاييقلي قوروجوسو كيمي گؤرمه­لي­دير. تسليم طلبلر و جبهه دئيشنلرين، ايديعالارينا رغما، حركاتيميز گوجلودور و گله­جك بيزيمدير. هركس، دوكتور لطيف حسنلي­نين بو ايل 21 آذرين ايلدؤنومو موناسيبتيله سياسي محبسدن يازيغي بياننامه­يه باخسا، قبول ائدر كي، رئژيمين سياسي حبسخاناسيندان بو آيدين و جسارتلي بياناتي صادير ائدن ميللي حركات، سارسيلماز آدديملارلا ايره­لي­يه يورويور.

    گله­جك بيزيمدير!

    13 دئكابر 2014

     



     

     

     

     

     

     

     

     

     

     

     

 

در باره نویسنده:

علي رضا اردبيلي

آخرین مطالب علي رضا اردبيلي