راسیسم

علي رضا اردبيلي: 

(دونيا آذربايجانلي­لاري كونقرئسي­نين، 22 آپريل 2012-ده اوكرائينانين

 

دانئتسك شهرينده كئچيريلميش 12 –جي قورلتاييندا تقديم اولموش معروضه­نين متني)

حٶرمتلي خانيملار، بئي­لر؛ آذربايجان، توركيه و عيراق پارلامئنتلريندن سايقيلي ميللت وكيل لري،

ديرلي قورولتاي ايشتيراكچيلاري،



دونيا تاريخي و حتي دونيانين ان ياخين تاريخي، آدلاري ميللتلر و اتنييك قوروپلار خريطه­سيندن هميشه­ليك سيلينميش مدنيتلرله دولودور. بابل، ائتروراين، كارتاژ، ميتاني، شومر، اسپارت، آزتئك، مايا، اينكا، آراقون و يوزلر و مينلر مدنيتلر و ميللتلر بوگون يالنيز تاريخين يادداشيندا قالميشلار.  بوگون ياشايان 6000 ديلين صاحيبي اولان مدنيتلرين بير چوخونون دا ياخين زاماندا بو سياهي­يه علاوه اولمالاري لابود ساييلير. بو سببدن بيز آرتيق ايكينجي جومهويتي­نين 20-جي يوبلئي­ييني قئيد ائتميش بير ميلته منسوب اولماميزدان فرح و غرور حيسي دويمالي­ييق. بو نائليت هئچ ده طبيعت قانونو دئيلدير. عكسينه اگر مدنيتلرين طالعينده طبيعت قانونونا بنزر بير شئي وارسا، اودا بو مديتلرين ابدي اولماماسي­دير. ايندي ايستر بو مدنيتلر اسگي ميصير، آشورلار، شومرلر، فنيقي­لر و يا روم امپرياسي اولسون يا ايستر  شرقي پروس. 
اگر معجزه­يه اينانماساق، كريم توركلري و چئچنلره نصب اولماميش، قوزئي آذربايجانين بوگونكو ايستيقلاليتي­ده بير پارا تاريخي فاكتورلار و آتابابالاريميزين دوزگون و دوشونولموش آدديملاري و وئرديكلري قوربانلاري­ني نتيجه­سي­دير.




دونيايا سپه­لنميش آذربايجانلي­لاري بو ميللتين ائلچي­لري­ ­ده سايماق اولار. دونيادا ان گليشميش ايسوئچ اٶلكه­سي­نين اينكيپشافيندا ان اٶنملي رول­لاردان بيري، ايسوئچين آمئريكايا كٶچ ائتميش موهاجيرلرينه مخصوص­دور. آمما اٶلكه داخيلينده هر هانسي دموكراتيك اينكيشافين يولون باغلاميش توتاليتر رئژيملرين دئوريلمه­سينده دياسپورا تشكيلاتلاري و فعاليتلري­نين رولو داهاد اٶنملي­دير. سون 2 ايلده سورعتله اينكيشاف ائتميش كامونيكاسيا تئخنولوقياسي­دا بو رولو قاباردير و دياسپورا فعاليتلري­نين داخيلده گئدن ميللي آزادليق موجاديله­سيله اينتقره اولماسينا يارديم ائدير. بوگون گونئي آذربايجانين آزادليغينا چاليشان دياسپورا اوچون ان طبيعي ايش مئيداني ائله قوزئي آذربايجان و توركيه دير. آمما بو ايكي مكاندا، گئدن بير چوخ فعاليتلره رغمن، بو اٶلكه­لرين حاكيم دائيره­لري يا هله گونئي مسئله­سيني اولدوغو كيمي گٶرمورلر يا اونون اهميتيني اولدغو كيمي درك ائتمه­ييبلر.

بوگون اورتا دوغودا، اٶلكه اٶلكه­نين آردينجا 3 و يا 4 اون ايل­ليكلرله عٶمور سورموش ديكتاتورالارين دئوريلمه­سي فونوندا، ايران ايسلام جومهوريتي­­ ده، طبيعي بير نامزد كيمي سيرادادير. بو فاكت بيزه هم اومود وئرير و هم بيزي دوشوندورور. ديني فاناتيزمين اسارتيندن قورتولوش، گئجيمش اولسادا بوتون ايراندا ياشايان ميللتلر اوچون موبارك بير حاديثه اولاجاقدير.

 


بو آرادا آما بيزي دوشوندورن، گونئي آذربايجان توركونون بو مبارك حاديثه­يه لازيم اولان حاضيرليق درجه­سي­دير. هله ده حتي قارداش توركيه­ جومهوريتينده ايرانين نه چوخ ميللتلي اولماسي و نه اوردا بٶيوك تورك نفوسونون اولماسي حاقدا معلومات يئترينجه دئير. سون آيلاردا جمهور باشقاني سايين عبدالله گولون تبريزده رسمي سفر زاماني، آذربايجانلي­لارين اونا قارشي سونسوز سئوگي و محبت تضاهورو حاقدا توركيه مئدياسي­نين شاشيرماسي بيزي­ده شاشيردي. دئمه­لي حتي قارداش توركيه­، گونئي آذربايجان حاقيندا چوخ درين بير معلوماتا صاحيب دئير. بو ايسه بيزي دوشوندورمه­لي­دير.



بو باخيمدان قوزئي آذربايجاندا وضعيت بام باشقادير. قوزئي­ده اينسانلاريميزين گونئي حاقيندا اولان شعورلو و شعورآلتي حساسليغي، يالنيز ديني بير ايناملا موقاييسه اولونا بيلر. بوگون گونئي آذربايجاندا گئدن ميللي آزادليق موجاديله­سي­نين معاصر دئوري­نين يارانيش تاريخي 20 يانوار 1990­دير و و بو فاكت اٶزو گونئي-قوزئي موناسيبتلريني هر آلترناتيو ايفاده­دن داها گوجلو ايفاده ائدير. آذربايجانلي بوگون اٶز وطني و عائيله­سيني سئومكله برابر، اوره­يينده "اوتاي" حاقيندا بير سئوگي مشعلي­ده گزديرير.

مسئله آما سئوگيله بيتمير. گونئي آذربايجاني اسارتدن قورتارماق اوچون انتلكتوئل فعاليت، دوشونولموش سياسي استراتژي و موناسيب تاكتيكلر لازيمدير. بو آرادا توركيه­ده ايران مسئله­سيني بير بوتٶو گورمك و اوردا آذربايجان فاكتورونو گٶرمه­مك، بير تهلوكه­لي وضعيت ياراديرسا، قوزئي آذربايجاندا نه اقتيدار و نه موخاليفتده، "گونئي سياستي" آدلي بير كونسئپسيانين اولماماسي يوموشاق دئسك بير ميللي چاتشمامازليقدير.


بوگون چوخدان­دير كي، دونيانين بٶيوك گوج داييره­لري ايرانين صاباحي حاقدا دوشونركن، بو اٶلكه­نين اتنيك خريطه­سيني اٶيره­نيرلر و اٶلكه­نين اتنيك تركيبيندن ايره­لي گلن وضعيتده اٶز ميللي منفعتلريني آراييرلار و چوخ تأسسوفلنديريجي­دير كي، قوزئي آذربايجان پارلامئنتي و دٶولتي­نين بو حاقدا بير سياستي يوخدور.


قوزئي آذربايجان و توركيه جومهوريتي بوگون اٶزلري­نين هرطرفلي اينكيشافلاريلا، گونئي­ده اوميدلر اوياديرلار و گونئي­يين كٶكسونده يانان آلووو، شعله­لنديريرلر. بو آز بير شئي دئير. آمما نه يازيق كي، آوروپا و آمئريكانين گوج مركزلرينده اولان آراشديرمالار و غرب دونياسي­نين استراتژلري­نين ايرانين صاحباحي حاقدا چوخداندان بري پلانلار جيزديقلاري حالدا، آذربايجانين قوزئي پايتختي و آنكارادا بو حاقدا دٶولتلر و پارلامئنتلر سويه­سينده ايش گئتمير. بوگون توركيه جومهوريتي حاقلي اولاراق، سوريه ميللتي­نين آزادليغي اوغروندا اٶز ايقتيصادي منافعيني قوربان وئره­رك، اخلاقي و اينساني باخيمدان هر تقديره لاييق آپاريجي بير رول اوينايير آمما دونياني ديني فاناتيزم ايخراجيله چٶزولمز پروبلئملرله قارشي-قارشي­يا قويموش ايران ايسلام جومهوريتي و بو رئژيمين اسيري اولان آذربايجان ميللتي­نه گلديكده، توركيه جومهوريتي اوره­گ آچان بير ايشلرله مشغول دئير.



گونئي آذربايجانين طالعي، هم قوزئي آذربايجان و هم توركيه جومهوريتي­ اوچون سون درجه اٶنم داشيماقدا اولدوغو فاكتي­ني اينكار ائدن اولماسادا، بو ايكي جومهوريت، ان آزايندان اٶز گله­جكلري نامينه و ان آزايندان آوروپا و آمئريكا قدر بو حاقدا فيكيرلشيب و اٶز كونسئپتلريني حاضيرلامالي­ديرلار.


بو تاريخي مسئوليتي، بو ايكي دٶولتين علاقه­دار دايره­لرينه چاتديرماق اوچون بلكه "دونيا آذربايجانلي لار كونقرئسي" ان موناسيب تشكيلاتدير. مسئول شخصلري قوزئي آذربايجان و توركيه­ده تانينميش ضيالي­لاردان عيبارت اولان بو تشكيلات، بلكه اٶزونون بيرباشا فعاليتلريندن داها آرتيق، بو ايكي دٶولتين ياتميش دايره­لريني اوياتماق و گونئي آذربايجانين طالعي­له باغلي مسئوليتلريني يادلارينا سالماقلا يارديمچي اولا بيلر.



نظرده آلماق لازيمدير كي بوتون ديكتاتور رئژيملرين دئوريلمه­سي و اونلارين يئرينده يارانميش يئني دٶولتلرين ايداره اولونماسيندا دياسپورا نوماينده­لري­نين پايي حدده آرتيق بٶيوك و حددن آرتيق لازيملي دير. بو رولون بٶيوكلويونو ايلك نٶبه­ده اٶلكه­ني داخيلينده بوتون دمكراتيك اينستيتوتلارين قاپالي اولماسي و هر بير موخاليف سسين بوغولماسيلا ايضاح ائتمك اولار. اوسته­ليك قلوبال­لاشان دونياميزدا اينكيشاف ائتميش آپاريجي دٶولتلرين وطنداشلاري اولان دياسپورا نوماينده­لري نه اينكي توتاليتر رئژيملري ييخماق بلكه ائله اٶز موقدراتينا حاكيم اولان ميللتلرين ده آغير مسئله­لريني حل ائتمكده و مختليف مسئله­لرده اٶز اٶلكه­سينه دوست قازانماقدا عوض ائديلمز رول اوينايا بيلير. بو قبيل دن اولان مٶوضوعلارين بيزيم اوچون ان قاباريقلي اٶرنه­يي ائله، قاراباغين هله­ده حل اولماميش پرابلئمي­دير.


آمما ائله هم قاراباغ مسئله­سي نين حللي و هم قوزئي آذربايجاني بوگونكو و صاباحكي فاجيعه­لردن قوروماقدا استراتژي بير رول اوينايا بيلن، گونئي آذربايجان­ين آزادليغي اوچون هم بوگون قوزئيده و توركيه جومهوريتينده بير سيرا جيددي ايشلر گٶرونمه­لي­دير و هم بو يولدا بوتون دياسپورا تشكيلاتلاري او جومله­دن داك­ين پايينا آغير مسئوليت دوشور.




 

 

span style=

در باره نویسنده:

علي رضا اردبيلي

آخرین مطالب علي رضا اردبيلي