آذربايجان فدرال دموكرات حركاتيندا واقع اولموش يول آييرمانين تاريخي-سياسي كونتكستي 

علي رضا اردبيلي:


(ايضاحات: بو مقاله، 11 مارت 2012 تاريخينده آ.ف.د.ح.-يندا باش وئرميش يول آييرمادان يارانميش سوآل­لاري جاوابلانديرماق اوچون كئچيريلميش پالتاك سئمناريندا اوخونموش مقاله­نين متني دير. بو سئميناردا طرح اولان سوآل­لار و اونلارا وئريلن جاوابلارين قيصالميش و يازيلي فورمو تئزليكله نشر اولاجاقدير)

هر اسارت، اٶز آردينجا، اسير اولموشلاردا ايلك نٶبه­ده بير شوك دالغاسي يارادير. سونرا چاره­سيزليك­دن دوغموش طالعين قرارينا تسليم اولماق انديشه­سي و اسارت درديني سيغاللاماق دٶورو گلير و اسارت زنجيرلريني قيرماغا غريزي چابالار، سونراكي دٶورلرين پايينا دوشور. اگر اسيرلر، اسارت شراييطينيده اٶز فيزيكي وارليقلاريني قورويوب، اينتلكتوئل گوجلريني ساغلام ساخلايا بيلسه­لر، زامانلا اٶز اسارتلري­نين ندنلريني، اسارت سيستمي­نين مئخانيزملريني و كٶله­لي­يين اونلارين جيسم و روحلارينا ووردوغو اوزون وعده­لي زيانلاري آناليز ائده بيليرلر. بو پراسئس­ين عطف نٶقطه­سي، آزادليغا اولان هوسلردن، غريزي و نتيجه­سيز چابالار يئرينه، دوشونولموش آزادليق ساواشي و اونا لازيم اولان كومپلكس علم، استراتژي و تاكتيكالار مئيدانا چيخماسي دير. ان قيصا سٶزلرله ايفاده اولموش بو سورج، اصلينده هم بير يا بير نئچه نسيل و هم يوز يا يوز ايللر چكه بيلر.



بو عمومي منظره­دن آذربايجانا گلك:


18-جي عصرين سونونا 2 ايل قالميش (1798) بوتوٶ و بٶيوك آذربايجان فتحعلي­شاهين، بٶيوك ايمپراطورلوق قورماق پلانلارينا قوربان گئدير. بٶيوك، واحيد و دفاكتو مستقيل آذربايجانين ايالتلريندن تبريزه جمع اولوب ميللي قورولتاي كئچيرن اورمو، تبريز، اردبيل،خوي و ديلمان، قره باغ، ماراغا، ساووجبلاغ، صايين قالا، باکي، ايروان، قاراداغ، شيروان، اوشنو، گنجه ،نخجوان و ساراب خانلاري، فتحعلي­شاهين قارشي­سيني آلا بيلميرلر.

51 ايل عٶمرو اولموش بٶيوك و احيد آذربايجانين داها بٶيوك ايران آدلي بير ايمپريا قورماق پلانينا قوربان اولماسي، اصلينده تاريخين ان طبيعي و قانونسال گئديشاتي­نين تكراري ايدي. ائله بوتون تاريخي تورك ايمپراطورلاوقلاري­دا اٶز فرمانلارينا تابع اولان ميللتلر و اٶلكه­لرين سايين و احاطه­سين آرتيرماقلا، بير كوسموپوليت سياسي حاكميت ياراديب، اٶز مشروعيتلريني "بيز توركلر" يئرينه، "بيز مسلمانلار"
و "بيز ايرانلي­لار" كيمي ايفاده­لر و سٶيلملرين (ديسكورسلارين) اطرافيندا قورموشلار. بو سيلسله تاريخي ايمپريا قورماقلارين سون تاريخي نوسخه­سي اولان 1798-ده فتحعلي شاهين، آذربايجاني مغلوب ائتمه­سي­ني، فاجيعه­وي ائدن جهتي، آذربايجانين، مودرن دٶولت­-ميللتر يارانان عصره، اٶز كيملي­يي يئرينه، ايران و روس كيم­ليكلريله قدم قويماسي­ايدي. بو حاديثه، مودرن دنياني فورمالاشديران ايكي بٶيوك اينقلابين آراسيندا باش وئريردي. آذربايجانين پايتختي اولان اورمو مغلوب اولاندا، آمئريكا بيرلشميش اشتاتلاري­نين باغيمسيزليغيندان (1776) جمعي 22 ايل كئچيردي و فرانسا اينقيلابي­ هله جرياندا ايدي اونون سونونا تكجه بير ايل قاليردي.

بئله ليكله تورك قاجار سولاله­سي­نين ايران تاج و تختينه صاحيب اولماق پروژه­سي، آذربايجان اوچون بير تاريخي مغلوبيتله باشلادي. بو آمما او ايللرده بوتون اسلام عالمينه مخصوص اولان ميللي فاجيعه­لرين بيري ايدي. بيرآز سونرا، روس ايمپرياسي آذربايجان ايالتلر و شهرلريني قوزئي­دن اشغال ائتمه­يه باشلايير. اورميه­نين فتحعلي­شاها تسليم اولوب حاكيم افشارلارين "بارفروش­آ" (اينديكي بابل شهرينه) تبعيد اولماسيندان جمعي 3 ايل سونرا يعني 1801-ده بيرينجي چار الكساندرين حاكميتي­نين باشلانيشيندا، آذربايجانين كازاخ سولطانليغي، يئني يارانميش "گورجوستان" تركيبينده روسيه­يه ضميمه اولور. البته ايلك روس اشغالي اورمونون سقوطوندان 2 ايل اٶنجه، دربندين روسيه­يه ضميمه اولماسيلا باشلاميشدي. 1804-ده گنجه و 1806 دا باكي سيسيانوف قوشونونا تسليم اولورلار. طالش 1809 دا اشغال اولور و معروف گولستان موقاويله­سي 1813-ده ايمضالانير. بلكه عمومي منظره­ني باشا دوشمك اوچون اشاره ائتمك يئرينده اولاركي گولوستان مقاويله­سي ايمضالانديغي تاريخيدن بير ايل اٶنجه بوخارست باغلاشماسي اساسيندا، عوثمانلي ايمپرياسي، روسيه­نين، شيمالي قافقازدا اقتيدارينا بويون قويدوغونا راضي­ليق وئرميشدير. بوندان سونرا باش وئرميشلري دئمك لازيم دئير و بو مقاله­نين اوخوجولارينا معلوم اولان حاديثه­لردير.

بئله­ليكله 1921 ده باش وئرن رضاخان چئوريليشيله، گونئي آذربايجانين فارس اسارتينه دوشمه­سي، دربندين اشغاليندان فورمالاشماغا باشلاميش اسارت تابوتونا ويريلان سون ميخ حٶكمونو اويناييردي. يعني آذربايجان 125 ايل عرضينده هم شيمالدا و هم جنوبدا اٶز ميللي باغيمسيزليغيني و هر بير فورمدا اولان ميللي دٶولت­چي­لي­ييني تام الدن وئرميشدير.

بئله­ليكله قوزئي آذربايجانين 1991ده آزادليغا چيخماسي، آذربايجانين 195 ايل سورموش اسارت تاريخينده ايلك بٶيوك غلبه­سي­ايدي. 195 ايل اسارت، و يالنيز وطنين شيماليندا، بير گئچيكميش غلبه! ايكي عصري احاطه ائدن بو دٶرده، يالنيز ايكي ايل قوزئي­ده و بير ايل گونئي ده آزادليق نسيمي اسميشدير و بونا گٶره ده، 1991-جي ايلده قوزئي آذربايجانين ايستيقلالي، چوخ موبارك بير حاديثه­ايدي. قوزئي­ده و گونئي­ده آجي مغلوبيت­لرله نتيجه­لنميش جهدلرين آردينجا ايلك غلبه، گونئي­يي ده آياغا قالديردي. بوگونون تاريخي پرسپكتيويندن باخاركن، 1991-دا قوزئي­يين ايسيقلاليتي­نين برپا اولماسي، بير قطي غلبه و آتا-بابالاريميزين اوندان اٶنجه اولان 2 ميللي دٶولت­لر قورماق ايشينده قازانديقلاري اوغورلار، موقتي ظفر كيمي گٶرونورلر و قالان تاريخي حاديثه­لر، اسارته قارشي باش وئرميش طبيعي رئاكسيالار كيمي گٶرونمه­لي­ديرلر.

بورا كيمي دئيلنلردن بير نتيجه آيدين گٶرونور: داها ايرانچي­ليق و روسچولوق ايدئولوقيالاري­نين قئيدلريندن اٶزونو آزاد ائتميش آذربايجان اوچون، گونئي­ده باشلانميش مدرن مبارزه­ده، هربير غيري عقلاني رجز اوخوماق، دونيايه جنگ اعلان ائتمك، ايران ميللتريني آزاد ائتمك و حتي دونيادا عدالتي برقرار ائتمك كيمي غيري رئال شعارلارا موراجيعت ائتمه­مك و ايدئولوژيلر اساسيندا دوست-دوشمان معينلشديرمكدن واز كئچمك لازيمدير.

آجي تجروبه­لر و مغلوبيتلردن آلينان درسلردن ده بير نئچه اورنك گتيرمك اولار:

1.
مشروطه اينقيلابيندا آذربايجانين هر پرابلئميني ايرانلا باغلاماق و تهراندا مجليس قورماقلا هر نه حل اولاجاق، كيمي فيكير هئچ بير سياست قايداسينا اويقون دئيلدير.

2. قوزئي­ده 1918-ين مارت آپريل آيلاريندا، بيرلشميش بولشويك و داشناك قووه­لر طرفيندن سوي قيريما معروض قالميش آذربايجان، سونرالار، بولشويكلرين يالان وعدلرينه اينانمامالي­ديرلار.

3. اورمو و اطرافيندا همان زمان و حتي ائله مارت آييندا باشلاميش جيلو-ائرمني قووه­لري-نين قتل عاملاري زماني، آذربايجاني بو قتل عامدان خيلاص ائتمك اوچون عثمانلي قوشونونلاري، سرحده ياخينلاشيرلار. قتل عاملا مشغول اولان مسيحي قووه­لر، معتمدالوزاره­نين واسيطه­سيله عثمانلي قوشونونا مئساژ يوللاييرلار كي، سيز بو ايشه موداخيله ائتمه­يين، بيز ايرانلي­ييق، بو قتل عامل دا ايرانين داخيلي ايشي دير! معتمدالوزاره كي قتل عاملارين بوتون جزئياتينا قدر ماجرانين شاهيدي­­ايدي، اٶز يازديغينا گٶره، گئدير و مئساژي دا اولدوغو كيمي چاتديرير! بو داها بلاهتين سون درجه­سي­دير. 300 مين اهالي­دن 200 نفريني قوربان وئرميش بير بٶلگه­نين باشچيسي، نه قدر گره­ك نائيو اولا كي، اونو قتل عامدان نيجات وئرمك ايسته­ين قوشونا بئله بير جاواب آپارا! بو آغير و آجي بير درسدير. آذربايجان يالنيز آذربايجان ميللتي­نه لويال قالمالي­دير. بو باخيمدان آذربايجان باسقين ائدن قوشون و دٶولتين بايراغي­نين رنگيندن آسيلي اولماياراق، هر بير نٶوع باسقي­يا قارشي اولمالي­ و قارشي دورمالي­دير.

4. گونئي آذربايجاندا ميللي حوكومت دٶورونده، ميللي حوكومتين سون درجه اينساني و دموكراتيك داورانيشلاري و عدالتلي اصول ايداره­سينه باخماياراق، اهالي­نين بير قيسمي، ديني اينانجلار و ايدئولوژيك اساسلاردا، ميللي حوكومتدن حيمايه ائيمه­دي. بو سببدن، قالان شرطلري نظره آلماساق، ايدئولوژيك باخيمدان بير نئوترال و رنگ­سيز رهبرليك ميللي بير حوكومتي ايداره ائتمك اوچون داها مصلحتلي اولا بيلردي.

5. 1946-جي ايلين ماي آييندا شوروي قوشونلاري گونئي آذربايجاني ترك ائدركن، و حتي داها اٶنجه بو حاقدا شوروي دٶولتي­نين قراري اعلام اولاندا، سيد جعفر پيشه­وري اوضاعني يئني­دن آناليز ائتمه­لي و ايمكان چرچيوه­سينده اٶزونه باشقا متحدلر و دوستلار آرامالي­ايدي. تأسسوف كي اونون اينانديغي ايدئولوژي هم اونون اٶزو اوچون بير ابدي دوست و دوشمن سياهي­سي وئرميشدير و هم اونا وورولموش ايدئولوژيك دامغا او زامانين ايدئولوژيلره بٶلونموش دونياسيندا، باشقالاريندا آذربايجان ميلي حوكومتينه قارشي معين ايدئولوژيك بير سياست فورمالاشديرميشدي. اگر سيد جعفر پيشه­وري او زامان، شراييط دئيشركن، اٶز ايمكانلارينا غيرايدئولوژيك و پراقماتيستي باخا بيلسه­ايدي و اگر گونئي آذربايجانا تأثير قويا بيلن قووه­لر اوچون، آذربايجان ميللي حوكومتي ايدئولوژيك دامغالي بير وارليق اولماسايدي، بلكه ميللي حوكومت اٶز وارليغيني قوروماغا بير ايمكان تاپا بيلردي يا بير سيرا باشقا ايمكانلاردان ايستيفاده ائتمه­ني دوشونه بيلردي. نه يازيق كي او زامان ميللي حوكومتين باشيندا اولان سيد جعفر پيشه­وري نين ايدئولوژيك ايناملاراي اساسيندا، يالنيز بير خاريجي دوست دٶولت وارايدي و واخت چاتاندا، ميللي حوكومت­ين طالعي­نه بو تك دوست، بٶيوك بير منفي تأثير قويدو.

او زامان آذربايجان ميللي حوكومتي ايكي گوجله عئيني آن­دا قارشي-قارشي­يا دورموشدو: بير: دونيا كمونيسمينه قارشي ايدئولوژيك دوشمن اولان غرب دونياسي­نين ديرلري و او زامانين سوپر گوجلري. ايكي: هئچ بير تورك دٶولتچي­لي­يينه دٶزمك ايسته­مي­ين تهران حاكيميتي.

سيد جعفر پيشه و اونون باشچيليق ائتدي­يي حوكومت اگر دونيايه ايدئولوژيك باخماسايديلار، بلكه بو ايكي گوجو، بير-بيرلريندن تجريد ائديب، آمئريكاسيز و اينگليس­سيز بير تهران رئژيمي­نه قارشي دورودولار، هم موذاكيره ده، هم موذاكيره­دن دوغوموش قرارلارين تهراني بويون قويماغينا ضمانت­ده و هم محتمل موحاريبه­ده.

بوتون بو فرضلرين هئچ بير تاريخي اهميتي اولماسادا، بير سيلسيله فرضي وضعيتلر، سناريولار و سئچيملر كيمي، ايدئولوژيك سياستين و ابدي و ازلي دوستلار و دوشمنلر سياهي­سينه صاحيب اولماغين، استراتژيك زيانلاريني نوماييش ائتديرمكده يارديمجي اولا بيلرلر.

6. باشقا آجي تجروبه 1358-ده خلق مسلمان حركاتي ايدي. بو حركات هم ولايت فقيه اصلينه قارشي ايدي و هم آذربايجان اوچون مدني موختاريت آدلانديرا بيلدي­يميز حق-حقوق طلب ائديردي. او زامان توتاليتر سول ايدئولوژي­سينه قاپسانميش آذربايجان گنجلري­نين ان ساوادلي­لاري و ان موتشكيل­لري، بير پارا بوگون گولونج و آنلاشيلماز ايدئولوژيك استنتاج اساسيندا، ولايت فقيه قوشونونا چئوريلديلر! ايشاره ائتدي­ييم او گولونج ايدئولوژيك آنلاييش او جومله­دن بو ايدي كي چون آيت الله شريعتمداري بير زامان سول­لارا قارشي اولوب و شوروي­نين افغانستاني اشغال ائتمه­سينه قارشي مٶوقع توتوب، پس اونون ولايت فقيه اصلينه قارشي بسيج ائتدي­يي نئچه ميليونلوق اوردو، قارشي­سيندا دوروب ضيدي امپرياليست، خميني­ني و اونون ولايت فقيه­-يني حيمايت ائتمك لازيمدير! (بو البته ايشين بير يٶنو ايدي. جناب حسن شريعتمداري­نيين سون زامانلار ايستيناد ائتدي­يي بير پارا سندلره گٶره، گويا خلق مسلمان حركاتيني بوغماق، بير باشا شوروي رئژيمي طرفيندن، توده پارتياسينا سيفارش وئريلميشدير.)

7. ماراخلي بير مقام، آذربايجانين قوزئي­يي و گونئي­ينده اينترناسيوناليست ايدئولوقيالارين وار اولمالاري و بو ايدئولوقيالاري اٶزلرينه رهبر توتان سياسي قووه­لرين بٶحرانلي و تعيين ائديجي مقاملاردا، كيمه و هارا لويال قاليب-قالماماق مسئله­لري­دير. 1918-1920 قوزئي آذربايجان­ين ايلك جومهوريتي آيلاريندا، آذربايجان كومونيستلري­، موستقيل و دموكراتيك آذربايجان دٶولتي چرچيوه­سينده بوتون دمكراتيك حاقلارا ماليك­ايديلر و او جومله­دن پارلامنت­ده علي حيدر قارايئو (1896-1938) و ميرفتاح موسوي (1891-1919) باشدا اولماقلا، نوماينده­لري وارايدي. بو حالدا بو كمونيستلر هم آذربايجان فعله صينفينه و هم آذربايجان دٶولت­چي­لي­يينه لويال اولوب، آذربايجان دموكراسياسي چرچيوه­سينده سياسي فعاليت ائده بيلرديلر. بونلار آمما اٶز ميللت-دٶولتلري يئرنه، روس بولشويك ايمپرياسي­نا لويال اولوب، آذربايجان دموكراتيك رسپوبليكاسي­نين محو اولماسي و روس اشغالينا چاليشديلار.

باشقا تاريخي حاديثه 1979-دا گونئي آذربايجان­دا باش وئرير. بو تاريخده گونئي آذربايجان­دا هم انترناسيوناليست ايسلام ايدئولوقياسي و هم اينترناسيوناليست كمونيسم ايدئولوقياسي طرفدارلاري فعال­ايدلار. بو ايكي ايدئولوقيادان، كمونيسم طرفدارلاري، تبريز-تهران قارشي دورماسيندا، تهرانا لويال قالديلار. دئمه­لي 60 ايل فاصيله­سينده آذربايجان­ين ايكي تاييندا كمونيستلر ايدئولوژي باخيميندان منطقي ساييلان صينفي (طبقاتي) لويال­ليقلاريندان علاوه، حاكيم اولان باشقا بير ميللته ده لويال اولوب، اٶز ميللتلري­نين اراده­سي قارشي­سيندا دورولار.

موهوم بير فرق

آمما داها ماراخلي بودور كي، بو ايكي حالدان بيرينده (قوزئيده 1918-1920-ده) آذربايجان كمونيستلري روسيه اشغالچي قووه لرينه بير حالدا لويال قاليرلار كي، اوردا روس كمونيستلر حاكيم ايديلر آمما ايكينجي حالدا (1979-دا گونئي­ده) تهراندان ديني فاناتيسم حاكيم ايدي! يعني قوزئي­ كمونيستلري آذربايجان فعله صينيفي و آذربايجان ميللت-دٶولت­يني ساتيب، كمونيست بايراقلي روس ايشغالينا خيدمت ائتديكلري حالدا، 60 ايل سونرا گونئي­ده، كمونيستلر ولايت فقيه بايراقلي تهران رئژيمي­نين قوشونونا چئوريليرلر!!!

گونئي آذربايجانين مودرن آزادليق موجاديله­سي

كئچميشين مغلوبيتلريندن درس آلميش گونئي آذربايجانين مودرن آزادليق موجاديله­سي، پراقماتيسم و عقلانيته سٶيكنميش، سياسي بير حركاتدير. آذربايجان­نين نه ازلي دوشمني يا دوشمنلري واردير و نه ابدي دوستلاري. دوشمن آختارماق، دوشمن تاپماق و دوشمنه قارشي قولاق كار ائدن تبليغاتي بير حيات طرزينه چئويرميش توتاليتر ايدئولوقيالار، آذربايجان ميللي آزادليق حركاتيني غلبه­يه سٶوق ائده بيلمز. بو حركات، اينديكي اٶز مودرن دٶورونده، بوتون مغلوبيتلردن درس آليب، 1991-ده قوزئي­ده كي غلبه­دن روحلانميشدير. بو سببدندير كي "آذربايجان دانيشير" و بير نئچه اوخشار سندلرين منطيقي دوامي اولاراق، "آمستردام بياناتي"، بير باشا گونئي آذربايجان دٶولتچي­لي­ييني برپا ائتمه­يي گونده­ليگه قويوب و بو دٶلت­چي­ليگين اساس كونتورلارينا صراحت وئرير: اينسان حاقلاري، سكولاريسم، قادينلارين تام برابر حقوق صاحيب اولمالاري و مودرنيسم. بو سندده نه "تورانچي"لار و نه "ايرانچي"لار آذربايجان دوشمنلري اعلام اولمورلار يا پتانسيل­لي تهلوكه­لر كيمي معرفي اولمورلار. بو سندده دئيلير:

"گونئي آذربايجان تورک ميلتي نين ميللي آزادليغي يولوندا موباريزه ده بو گونکو فارس راسيسم­يني تمثيل ائدن ايران ايسلام جومهورييت­يني اساس مانعه کيمي گؤرور. چونکو بو رئژيم هر نؤوع دئموکراتيک دييشيکلييه قارشيدير."


بوتون بو فاجيعه­لي تاريخي تجروبه­لر، آذربايجان اوچون بو درسي وئرميشدير كي، اسير و ضعيف بير ميللت اٶز آزادليغيني هرنه­دن اوستون توتمالي و يارانميش هر وضعيتده يالنيز بير مقصد گودمه­لي­دير: قورتولوش! اسير بير ميللت اوچون ميللي قورتولوشدان باشقا هر نه موقتي و گلدي گئدر ساييلمالي دير. نه دوست و نه دوشمن ازلي و ابدي اولمور و ميللي آزادليغي رهبرليك ائدن قووه يالنيز ميللي منافع اساسيندا اٶز دوستلاريني سئچمه­لي­دير و ان اساسي مسئله، ميللي قورتولوش موجاديله­سي موفق اولانا قدر، هر بير پولاريزاسيون، ايسته­نيلمزدير و مغولبيتي ضمانت ائدن عاميل كيمي گٶرونمه­لي­دير. بوتون بونلار البته ميللي دٶولت­چي­لي­يه دايير پلانلاردا اينسان حاقلاري، دموكراسي، سكولاريسم، قادين حاقلاري و سوسيال عدالت مسئله­لرين آرخا پلانا آتماق معناسيندا دئير. بو او دئمكدير كي، مادامكي ميللي دٶولتچي­ليك (فدرال يا باغيميسزليق فورمالاري­نين ايكي­سيندن بيرينده) الده اولماييب، بو دٶولت نه اينسان حاقلاريني ريعايت ائده بيلر، نه سكولار اولا بيلر و نه هئچ باشقا كاراكتره ماليك اولا بيلر.

بوگون قوزئي ده و گونئي ده جوره به جوره اسارتين آجيسي­ني دادميش آذربايجان نه كورطبيعي نيفرتدن عزيمت ائدير و نه آجيق چيخماق ايستير. اٶز قوزئي­يينده باغيمسيزليغيي­نين 20 –جي يوبليئييني قئيد ائتميش آذربايجان، گونئي­ده متين و اينتكلتوئل بير ميللي و سون درجه ده دموكراتيك سياسي حركات آپارير. بو مودعايه چوخ شاهيدلر گتيرمك اولار. بير نئچه اٶرنك:

1. يازيلميش جمعي سندلر: طومارلار، آلتيندا ايمضالار توپلانميش آچيق مكتوبلار، بابك قالاسيندا و باشقا يئرلرده كئچيريلميش ميللي كوتله وي توپلانتي­لاردا صادير اولموش قطعنامه­لر، سياسي تشكيلاتلارين سندلري،

2. 1358-جي ايلدن نشره باشلاميش ارليق­دان بوگونه كيمي مطبوعات و مجازي فضادا نشر اولموش مينلرله مٶليف­دن مينلرله سياسي مضمونلو مقاله­لر.

3. ميللي-تاريخي گونلر و ايلدٶنوملرده داخيلده و خاريجده كئچيريلن مراسيملرده سسلنن چيخيشلار وبديعي ماتريالين سياسي و دموكراتيك مضمونلاري.

4. بير چوخ نادير حاللاري موستثنا ائتمكله، 2006 ماي آييندا باش توتموش ميللي عوصيان و بير چوخ باشقا خيابانلاردا جريان ائتميش كوتله­وي آكسيالاردا وئريلن شعارلار.


5. ايندي­ليكده اون مينلرله گونئي آذربايجان ميللي فعال­لاري­نين فعال اولدوغو سوسيال شبكه لرده ياييلان و پايلاشيلان ماتريالين سياسي مضمونو.


6. اٶلومه حٶكم ائدن و ياشاماغا چاغيران ايفاده­لرين گوگل آختاريش موتورونون آختاريشالري اساسيندا، اينترنتده سايلاريني جمع ائديب و اونلارين جمع­ينده، "اٶلوم اولسون" و "ياشاسين" ايفاده­لري­نين پايلاريني معينلشديرمك، آشاغيدا كي جدولده اولان نتيجه­لري وئرير:

 

 

 

بو آختاريش نه قدر غيري علمي اولسادا، فرقلر كيفايت قدر بٶيوكدورلر و بو فرقلر آذربايجان­ين هم گونئي­ده و هم قوزئي­ده صلح سئور و باريش ايسته­ين تولرانت ميللت اولدوغونا دلالت ائدير.

بوتون بو سادلانان اٶرنكلر، هاميسي ايجتيماعيتين گٶزو اٶنونده باش وئرميشدير و آسانليقلا كونترول اولوب و لازيم اولان حالدا سندلشه بيلرلر.

منجه بوگون، نه آذربايجان ميللي آزادليق حركاتي و نه حتي آذربايجان ميللتي آراسيندا اولان غيردمكراتيك داورانيشلار و شعارلارلا باريشماق لازيم دئير. بيز هئچ بير شراييط ده اينسان حاقلاي و دمكراسي-ني تعطيل ائديب يا اونلاردان اٶز ميلتيميزه تخفيف وئره بيلمه­ريك. بيز اونوتماميشيق كي، كي تاريخده، اينسانلار اوچون ان يوكسك درجه­ده عدالت وعد ائدن كمونيست رئژيملر، ان يوكسك درجه­ده فاجعه­لري بشريته تحميل ائتديلر. هابئله ميللي حاقلار طلب ائدن حركتلر ده، اينسان حاقلاري و دموكراتيك پرينسيپلره لاقيدليك ائتمكله، فاجيعه­لره آپاريب چيخارماماقلارينا هئچ بير قارانت يوخدور. آمما (و بو موهوم بير "آمما"دير) بو او دئمك دئيل­كي هئچ بير اساس اولمادان بير طرفدن ايديعا ائدك كي ميللي حركات ايچينده بيزدن سواي هامي غيري دمكرات­دير و بير طرفدن حاكيم ميلته منسوب اولان سياسي قووه­لرين سيرالاريندا دموكرات قووه­لرين اولماسيني وعد ائدك آمما نه اٶز غير دمكورتلاريميز و نه حاكيم ميللتين دموكراتلاري حاقدا كونكرت بير معلومات تقديم ائده بيلمه­يك.
يوخاريدا دئيلنلر، آذربايجان فدرال دموكرات حركاتيندا واقع اولموش يول آييرمانين تاريخي-سياسي كونتكستي كيمي گٶرونمه­لي­دير. بو تشكيلاتدان جمعي استعفا وئرميش دوستلار، سون آيلاردا بيردن-بيره بو تشكيلاتا باغلي اولان شخصلرين ديليندن بيان اولان بير پارا يئني شعارلاري، گونئي آذربايجان ميللي آزادليق حركاتي­نين آغير ايتگي­لر و آجي مغلوبيتلر باهاسينا قازانديغي تجروبه­لره اعتيناسيزليق كيمي گٶرورلر.


mso-spacerun: yes;آذربايجان دانيشير

در باره نویسنده:

علي رضا اردبيلي

آخرین مطالب علي رضا اردبيلي