استعفانامه:
(بو استعفانامه نين جاوابيندا يازيلميش "آذربايجان فدرال دموکرات حرکاتى نين ايجراييه هئياتى نين بیلدیریشى"، آشاغيدا علاوه اولوبدور)


درين تأسسوفله بيلديرمك ايستيريك كي، سون آيلاردا آذربايجان فدرال دموكرات حركاتيندا، بو تشكيلاتين و ائله­جه­ده آذربايجان ميللي حركاتي­نين سيرالاريندا روح بيرليگي و امكداشليغا چاغيران فيكيرلر يئرينه، بير پارا بيزيم اوچون ياد و قبول اولونماز شعارلار آرايا آتيلميشدير و بير نئچه مسئوليت داشيان شخصلر، بو يئني فيكيرلري، هئچ بير دمكراتيك تشريفات يولو كئچمه­دن، آذربايجان فدرال دموكرات تشكيلاتي­نين رسمي نظرلري كيمي تبليغ ائتمكله مشغول اولموشلار.
يارانميش وضعيتده بيز اٶزوموزو ايكي­يول آيريجيندا گٶروروك:

الف. غيري دمكراتيك يول­لارلا يئني يالنيش سياسي خط­ين تحميل اولماسينا پاسيو تاماشاچي اولماق و يا:
ب. حياتيميزين موهوم بير حيصه­سيني يارانماسي و بويا باشا چاتماسينا صرف ائتدي­ييميز تشكيلاتين سيرالاريني ترك ائتمك.


بونونلا بيز بيلديريريك كي، ايكينجي آلترناتيوي سئچه­ره­ك، آذربايجان فدرال دمكراتيك حركاتي­نين سيرالاريني ترك ائديب و بو تشكيلاتدان استعفاميزي اعلان ائديريك.

البته كي يارانميش وضعيتده، ان دوزگون يول، دمكراسي قايدالاري چرچيوه­سينده تشكيلاتين عضولري­ آراسيندا اكثريت و اقليت­ين اراده­سي­نين بللي اولماسي، اكثريت­ين سياستي­نين رسمي سياست كيمي ايجرا اولماسي و اقليت­ين فيكري­نين بير حيزبي فراكسيون حاليندا اٶزونو تبليغ ائتمه­سي اولمالي­ايدي. آمما تأسسوفله داخلي دمكراتيسم­ين اولماماسي و خصوصيله ايجرائيه هيئتين بير نئچه عوضونون هئچ دمكراتيك و سياسي پرينسيبه بويون قويماماسي و نتيجه­ده كيچيك بير اقليت­ين فيكرلري­نين تشكيلاتدا حاكيم خطه چئوريلمه­سي، بيزي، اٶز يولوموزو اونلاردان آييرماغا مجبور ائتميشدير.

بيز اينانيريق كي ميللي حوكومتين ياديگاري اولان مرحوم اوستاد محمد علي فرزانه­نين فعال ايشتيراكيله يارانميش آذربايجان فدرال دموكرات حركاتي، بوگونه كيمي ميلتيميزين ميللي آزادليغي يولوندا موهوم آدديملار آتميشدير و سون آيلاردا غير دمكراتيك فيكيرلرين، غيردمكراتيك يول­لارلا بو حركاته تحميل اولماسي، بو 8 ايلين نائيليتلرينه كٶلگه سالمامالي­دير.

اٶز ميلتيميزين آزادليغينا سارسيلماز اينام و سونسوز فداكارليقلارلا آتيلان آدديملارين هئچ بيري عبث يئره اولماميشدير و بو ايل­لرين عرضينده بيز ثوبوت ائتميشيك كي سئنساسيالاردان اوزاق، بيليم، جسارت، تواضع­كارليق و اعتدال­لا آتيلان آدديملار داها اثرلي و داها ثمره­لي اولموشلار. بيز بو يولو دوام ائده­جه­ييك.
بيز بو ايللرده چي­يين-چي­يينه فعاليت ائتدي­يميز دوستلاريميزا سايقي دويوب و اونلارا آذربايجان ميلتينه قوللوق ائتمكده اوغورلار آرزو ائديريك.
بيز هئچ بير نئقاتيو تبليغات يا فعاليتي دوزگون سانميريق و اثباتي اولاراق اٶز آماليميز اوغروندا فعاليت ائتمه­يه اينانيريق.
تئزليكه بو استعفانامه­ده گلن مدعالارين تفرعاتيني نشر ائده­جي­ييك.

 

اسماعيل جميلي،
سعيد عزيزي،
سلامت دشتي،
سيمين صبري،
علي رضا اردبيلي،
علي ملازاده،
يونس شاملي


21 فورال 2012

 

آذربايجان فدرال دموکرات حرکاتى نين ايجراييه هئياتى نين بیلدیریشى

21فئورال2012 تاریخینده ا.ف.د.ح نین بیر نئچه عضوو تشکیلاتدان استعفا وئردیلر.

بو استعفا بیزی ده بوتون آذربایجان سئونلر وگونئی آذربایجانین میلی حقوقى و اؤز موقدراتينى تعيين ائتمک يولوندا موباريزه ائدنلر کيمى ناراحات ائتدی. بیز اینانیردیق کی اختلافلاری ا.ف.د.ح نین پلاتفورموچرچیوه سینده حل ائتمک اولاردى، آنجاق، سون واختلاردا بودوستلارین باخیشلاری ودوشونجه لری بيزيم پلاتفوما اویغون دئیلدیر. اودور کی داخیلی بحثلری یکونلاشدیرمادان استعفا وئردیلر.

آذربايجان فدرال دموکرات حرکاتى بو دوستلارین استعفاسینی قبول ائدیر واونلارا آذربایجانین آزادلیغی یولوندا موباريزه ده اوغورلار دیله ییر.

آذربايجان فدرال دموکرات حرکاتى نين ايجراييه هئياتى 22 فئورال 20012