علي رضا اردبيلي:

(بو مقاله 13 ماي 2011 تاريخينده حبيب بي بايجان­ين باش آدمين كيمي آپارديغي پالتاك سئمينارينداكي چيخيش­ين متني­دير و اينترنت نشريندن اؤنجه قيصا علاوه­لر اولمشدور)

ديالوگ مدنيتي

حاضيركي مقاله­نين دواميندا حاقيندا يازديغيم هر اوچ حاشيه­ني، هرنه­دن آرتيق بير-بيرلرينه بنزه­دن، ائله اونلارين ديالوگ مدنيتيندن چوخ اوزاق اولماقلاري­دير.

ديالوگ مدنيتي نه دير؟

چئشيدلي فيكيرلرين صاحيبلري­نين، استدلال قوه­سيله، اؤز آرقومنلريني عياني وكتبي دباتلاردا آرايا قويماق، و هر دباتين كيفايتي حيس اولاركن، ايلكين ايختلافلاري، آشاغيداكي اوچ يئره بؤلمك مومكون اولورسا، اوندا ديالوگ طرفلري آراسيندا "ديالوگ مدنيتي" مؤوجوددور:

  1. دبات جريانيندا اوزرينده اولان ايختيلافلي مسئله­لرين، اطرافيندا آنلاشما يا كومپروميس يولوايله راضي­لاشديريلميش مسئله­لر. بونلار داها ايختيلافلي مسئله­لر سياهي­سيندن چيخاريلير.
  2. اوزرينده ايختيلافلارين دئيشمز قالديغي مسئله­لر. بو مسئله­لر حاقيندا هر ايكي يا نئچه طرف فيكيرلريني آرتيق سؤيله­ميشدير و دباتي تعقيب ائدن آئودتيوريانين هر بير نفري بو مسئله­لرين حاقيندا يا ايلكين فيكيرلرينده قاليرلار يا يئني قناعتلره گليرلر.
  3. بيرسيرا مسئله­لرين آرتيق مطالعه و تارتيشيلماسي حاقيندا توافق اولونور. طرفلر دئيرلر كي آپاريلان موباحيثه­لر بو مسئله­لر اطرافيندا دقيقلشمه و درينلشمك طلب ائدير و بو موباحيثه­لري آچيق ساخلاييريق.

ساده ديلده دئسك، طرفلر دانيشيرلار ونتيجه­ده بيرسيرا مسئله­لر اطرافيندا ياخينلاشيرلار، بير سيرالاري حاقدا آنتاگونيسم­ين (باريشيلمامازليغين) حاكيم اولماسي معلوم اولور و بيرسيرا سورونلارين حاقيندا هله دانيشماغين يئري قالماسي آيدينلاشير.

بو اوچ حاشيه­ني ايشي ايتتيهام وورماق، ياخا توتماق، دبات­دان قاچماق، پرونده باغلاماق، اوز مودعالاريني تكرار و تكرار آرايا آتماق و سايير نؤوع ديل و بيان خشونتينه متوسل اولماق­دير.

بيرينجي ميثال: 2010-جي ايلين فورال آيي نين 21-ي دونيا آنا ديلي گونو موناسيبتيله، نئچه يوز تانينميش آذربايجانلي بير بيانات ايمضالاديلار. بياناتدا بئله بير جومله وارايدي: "بیش از هشت ماه از آغاز جنبش ضد استبدادی ایران می‌گذرد." هر استعدادسيز آدام گؤروركو بوردا بير "اخير" سؤزونون يئري بوشدور و جومله داها دقيق اولماق اوچون "بیش از هشت ماه از آغاز جنبش ضد استبدادی اخير ایران می‌گذرد." كيمي فورمول­لاشمالي­ايدي. طبيعي كه بو سندي حاضيرلايانلارين هئچ بيري سون يوز ايلين دمكراتيك حركاتيني دانميرلار. چونكو ايراندا بئله بير تفكورون نمونه­سي هله بوگونه كيمي اولماميشدير. بو اسكيگ­ليك البته دونيانين ان دمكراتيك اؤلكه­لرينده ده ان موكممل تبليغات آپاراتلاريندا دا باش وئرير. آمما هامي­يا معلوم اولدوغو كيمي ايرانچي كشف و روسوا ائتمكده مجتهد جامع الشراييط اولموش معلوم شخص بو حاقدا آيلارلا سمعي و بصري چيخيشلاريندا گؤزونو يوموب، آغزيني آچيب و صغير و كبيره رحم ائتمه­دن اؤزونو روسواي عالم ائتدي. اوخشار كامپانيالار دوكتور صدرالاشرافي­نين هانسي­سا بير جومله­سي يا بير كلمه­سي اساسيندا آيلارلا جرياندا اولماسي ياديميزدادير.

ايكينجي ميثال: آقا سيروس مددي­نين جين­نامه­يه بنزر سيتات­سيز، سندسيز ايتتيهام­نامه و افتيرانامه­سي و اونون آردينجا گونآذ تي وي­ده اونا وئريلن سوآل­لارا مواسيبتي. (بو مسئله كتبي­لشميش حالدا بو مقاله­نين اته­يينده وئريلميش قايناقلارين 3-جو مقاله­سينده آچيق آيدين گؤرسنير؛ علي رضا اردبيلي: ناممكن كردن ديالوگ كتبي و شفاهي)

 

تعريف: "آذربايجان ميللي حركاتي"

آشاغي­داكي اوچ شرطي يئرينه يئتيرن تشكيلاتلار و فردلر بيرليكده "آذربايجان ميللي حركاتي" سايلير:

  1. دونيا اينسان حاقلاري بياننامه­سي و اونون علاوه كونوانسيونلارينا اينانماق. ها بئله آذربايجانلي­لارين بو حاقلاريي­نين، پهلوي و ايسلامي رئژيملرينده پوزولماسيني تصديق ائتمك.
  2. ايراندا تورك ميلتي و او جومله­دن آذربايجان توركلرينه قارشي اعمال اولونان آيري سئچگي­ليك، تاريخا چوخ ميللتلي و چوخ مدنيتلي ايران اؤلكه­سيني مونو ائتنيك فارس دؤولت-ميلتينه چئويرمك پروژه­سي ريپورتر-آيرونسايد-رضاخان حربي چئوريليشي­ايله باشلانميش و بوگونه كيمي دوامي اولدوغونو قبول ائتمك.
  3. تورك ديلي و تورك ديلينده تحصيل سيستمي­نين آذربايجان و غير آذربايجان ايران توركلرينه قورولماسي­نين ضرورتيني ايره­لي سورمك.

 

تعريف: "آذربايجان ميلي حركاتي­نين متني"

آذربايجان ميللي حركاتي، يوخاريداكي 3 بنددن علاوه باشقا ايناملاري و ايستكلري­ده وار كه او جومله­دن 21 آذر 2009 تاريخينده 12 بندليك آمستردام بياناتيندا فورموله اولموشدور و بوردا ايجمال­لا 3 بندده خيلاصه اولا بيلر:

  1. ايراني مونواتنيك فارس دؤولت-ميلتينه چئويرمك مقصدي داشي­يان پروژه قارشي­سيندا اثباتي آلترناتيو، ايران مركزي قدرتي­نين، ايراندا ياشايان ميللتلر آراسيندا بايلاشماسي، تورك ميلتينه اؤز مقدراتيني معينلشديرمك حاقي وئريلمه­سي و آذربايجان­ين ايران فدرال جومهوريتي­نين بيناسيندا كؤنوللو ايشتيراكي يا آذربايجان تاريخي ارضي­سينده موستقيل گونئي آذربايجان دؤلتي­نين يارانماسي.
  2. فارس راسيسمي­نين اينديكي نوماينده­سي اولان ايران ايسلام جومهوريتي­ني، آذربايجان آزادليغي يولوندا اساس مانعه گؤرمك.
  3. سكولار و حقوقو دؤولت قورلوشوندان حيمايت ائتمك، قادينلارا قارشي جينسي آپارتايده قارشي اولماق، اعدام جزاسي و ايشكنجه­ايله موخاليفت، قيد شرطسيز فردي و مدني آزادليقلار و آمستردام بياناتي­نين قالان بندلري.

 

بو ايكي تعريف­ين فرقي

بو ايكي تعرفي موقاييسه ائدركن معلوم اولور كي، آذربايجان ميللي حركاتي­نين متني، حركاتين زيرمجموعه­سي­دير. يعني حركاتين بير حيصه­سي هله­ليك يا اثباتي آلترناتيو حاقيندا قرار وئرمه­ميش يا بو حاقدا هئچ فيكري يوخدور. طبيعي كي گله­جكده حركات و ميللي موجاديله­نين گئنيشلنيب اينكيشاف ائتمه­سيله، معين بير مرحله­ده اثباتي آلترناتيو عمومي ميللي موذاكيره مؤوضوعسو اولاجاقدير و بو حالدا اهالي­نين چوخلوغو يا بوگون ايكي اساس اثباتي آلترناتيو ساييلان چؤزوم يوللاريندان بيريني يا تام يئني بير آلترناتيوه مئيل تاپاجاقلار و ميثال اوچون بير دمكراتيك رفراندوم ميللتين ايسته­يينه حقوقو و رسمي استاتوس وئره جكدير.

مسئله­نين اهميتي

بو مقاله­نين مودعالارينا گتيريلن ميثال­لاردا، جمعي 7 نفرين آدلاري حال­لانميشدير. حركاتين حاشيه­سينده اؤزلريني گؤسترنلرين خاريجده سايلاري بلكه اوچ يا دورد قات بو رقم­دن آرتيق اولماسي منه معلومدور. بوردا يالنيز جمعي 7 نفرين ايشلري و سؤزلرينه استيناد ائتمه­نين سببي بو جماعتين اساس اعتيباريله شيفاهي آداملار اولماسي و اونلارين شيفاهي سوؤزلرينه استيناد ائتمه­نين غيري مومكون اولماسي­دير. آمما نه دن خاريجده سايلاري وور-توت 20-30 نفر اولان جماعتين حاقيندا موباحيثه لازيم­دير:

  1. بو جماعت سيستماتيك بير طرزده اؤزلريني حاشيه­دن اورتايا چكمك اوچون، ميللي كادرلار و ميللي ضيالي­لارا قارشي تحقير و نيفرت كامپانيالاري يولا سالماقلا، حركاتين مؤوجود ائنرژي­سيني لازيم­سيز موباحيثه­لره صرف ائديرلر. هر ايكي حاشيه اؤزلريني ديقت مركزينه چكمك اوچون دريدن قابيقدان چيخيرلار. بو مقصده نائل اولماق اوچون هرايكي قطب­ين اساس تاكتيكاسي، حركاتين متن­ينه هجوملار تشكيل ائتمكدير. هر ايكي جريان "ياخا توتماق"كيمي ايشلره ال آتيرلار و هر كامپانيا "كور توتدوغون بوراخماز" قايداسي اساسيندا، بير مسئله­نين اطرافيندا قورولور و راكت موتورلاري كيمي بوتون ائنرژيلري توكنه­نه قدر، شيدتله دوام ائدير. هجوملارين آرخاسيندان، بو قطب­لاردا بير اؤلوم سكوتو حاكيم اولور سانكي نؤبتي فيرتينايا حاضيرلاشماق اوچون ائنرژي توپلاماقداديرلار.
  2. تورانچي آرايانلارين تخريبات گوجلري: بونلارين سايلاري آز اولسادا، تخريبات گوجلريني دانماق اولماز. اگر بيرنفر اؤزونو آذربايجان ميللي فعالي كيمي تانيديب و تاني­ناندان سونرا گلير حركاتين ايچينده "ايرقچي"، "توركيه عاميل­لري" اولماسي حاقيندا فارسجا يازي يازيب فارس سايتلاريندا نشر ائدير و او سايتلارين مسئول­لاري­لا اولدوقلاري موناسيبتلردن استيفاده ائديب، سهو مودعالارينا قارشي جاوابلارين نشري­نين قاباغيني آلير، حتي تك بير نفر كيمي، فارس راسيسمي­نين نوماينده­لرينه ميللتيميزه قارشي چوخ كسرلي بير سيلاح وئريرلر. سون گونلرده آذربايجان يوروويژين مسابيقه­سينده بيرينجي يئري توتماقلا تاريخي بير ظفره ايمضا آتماسيندان سونرا و 22 ماي سونامي­سي­نين ايلدؤنومو عرفه­سينده بو 7 نفرين بيري­نين جين­نامه­يه بنزر كونكرت هئچ نه­يي اؤزونده ائحتيوا ائتمه­دن حتي بير سيتات وئرمه­دن، ميللي حركاته قارشي نيفرت كاتالوقي­نا بنزر بير يازي، سايير آنتي تورك يازيلارلا برابر، ايران گلوبال سايتندا پيدا اولدو. ماراخلي دير كي، هم بو جين­نامه و هم اونون ياني سيرا نشر اولان بابك اميرخسروي آدلي بير وجودون ايمضاسيي داشيان، باشقا آنتي تورك بير يازي اسگي يازيلاريديلار كي دفعه­لرله فارس مئديالاريندا نشر اولموشديرلار و ايندي سانكي احضار ارواحلا مشغول اولان بيريسي اونلاري خورتلادماغي مصلحت گؤرموشدور!

بو مقاله­نين يگانه مقصدي ميللي حركاتين حاشيه­سينده اولان بيرسيرا جريانلارين حاقيندا اولان معلوماتلار اساسيندا اونلاردان بير ييغجام تصوير وئرمك­دير. بو ظاهيرده بير-بيرلرينه ضيدد آمما عملداه چوخ اوخشار جهتلري اولان حاشيه­لري بير فنومن كيمي آناليز ائتمك، ميللي حركاتين ساغلامليغيني قوروماق باخيميندان چوخ واجيب بير ايشدير. حاشيه­لر يالنير آذربايجان ميللي حركاتينا مخصوص دئيل­دير و بوتون سياسي و ايجتيماعي حركاتدا بو فنومني گؤرمك اولار. حاشيه­لر توپلوملارا مخصوص اولاندا، اونلار بير چوخ حال­لاردا، ياريم كولتور (subkultur ) آدلانيرلار.

3. ايرانچي آرايانلارين تخريبات گوجلري: بو جماعت سيستماتيك بير طرزده لومپنيزم و ايفراطچي ايشلره ال وورماقلا، اؤزلريني -منفي اوبرازلار كيمي اولسادا- ديقت مركزينه چكيرلر و هيپرآكتيو خسته­لر كيمي شيفاهي مئديا تريبونالاريندان، حركاتين متني و اؤزلرينه رقيب سانديقلاري اينسانلارا، هيستريك هجوملار تشكيل ائديرلر. اوسته­ليك بونلارين دوشونولمه­ميش ايفاده­لري و شعارلاري، ميللي حركاتين دوشمنلري طرفيندن دوشونولموش بير سهو اساسيندا، بوتون حركاتين حئسابينا يازيلير.

حاشيه­لر

  1. ميللي حركاتين 3 بندليك تعرفينه شاميل اولان و اؤزلري­نين بو حركاته باغلي اولمالاريني بيان ائدن وطنداشلاريميزين، آمستردام بياناتي­ني قبول ائديب-ائتمه­مه­لريندن آسيلي اولماياراق، بير سيرا ساحه­لرده عقلانيت­دن قاچماق يا عقلانيت­له قارشي­دورماق كيمي سجيه­لنه بيلن فيكيرلر و عمللر صاحيبلريني "حاشيه آخينلار" آدلانديرماق اولار. (بو فيكيرلر و عمللرين سياهيسي مقاله­نين دواميندا گله­جكدير. )

2. ايشاره ائتدي­ييم كيمي، حاشيه­لره باغلي اولان فعال­لارين سايلاري بوگون چوخ آزدير، آمما گله­جكده خصوصيله بؤحراني شراييط­ده اونلارين بيري يا نئچه­سي­نين روشد ائتمك ايمكاني­نين رد ائتمك اولماز آمما بوگون بئله ائحتيمالين قوه­دن فعله كئچمه­سينه دلالت ائدن فاكتلار الده يوخدور.

 

3. حاشيه جريانلار حاقيندا يكي سهو ائتمك اولار:بير، بو جريانلارين "حاشيه"ده اولمالاري اوچون اونلارين ميللي حركاتدان كنار حئساب ائتمك. (بو مسئله­يه من قاييداجاغام) ايكي: بو حاشيه­لرين حركاتلا موناسيبتي نظره آليب اونلارين حقيقي چكيلريني نظره آلمادان، اونلارين عقلانيت­دن و دموكراتيك پرينسيپلردن كناردا اولمالاريني بوتون حركاته تسري وئرمك.

 

 

تعريف: "حاشيه"لر

منجه آذربايجان ميللي حركاتي تعرفينه شاميل اولماق شرطيله، آشاغيداكي سوآل­لارين بير يا نئچه­سينه موثبت جاواب وئرنلري، ايكي نفردن آرتيق عوضوي اولان و اعلان اولموش يا اولمايش شبكه حاليندا فعاليت ائتديكلري حالدا، "حاشيه آخين" آدلانديرماق اولار. هر سوآلين اؤنونده او مودعالاري ايره­لي سوره­نلرين سؤزلرينه يازيلميش نقدلره ايشاره اولونور. ايشاره اولان قايناقلارين سياهيي­لري و لينكلري مقاله­ني سونوندا وئريلميشدير)

  1. آيا قوزئي و گونئي آذربايجانا قارشي اراضي ايديعالاري و آذربايجانا قارشي باش وئرميش حربي ايشغال­لار و سوي قيريملارين نتيجه­سينده گونئي آذربايجاندا يارانميش آييق-ساييق اولماغين ضرورتينه اينانماق، قوزئي آذربايجان و توركيه جومهوريتلري­نين بيزه صدور ائتديكلري سياست و شعار آدلانديرماق اولار؟ (صمد نيكنام، سيروس مددي طرفيندن يازيلميش سؤزلر. باخين 2-جي، 4-جي و 12-جي مقاله­لره)
  2. آيا آذربايجان ميللي حركاتي سيرالاري داخيلينده، ايران ايسلام جومهوريتي و سايير راسيستي محفل­لرين ترمينولوژي­سيندن ايستفاده ائتمك اولار؟ (سيروس مددي طرفيندن يازيلميش سؤزلر. باخين 2-جي مقاله­يه)
  3. آيا ميللي حركاتين داخيلينده، پانتوركيست، خائن معناسيندا ايرانچي و هر باشقا فنومن­دن، اونلاري تعريف ائتمه­ييب، مصداقلاريني گؤسترمه­دن دانيشماق اولار؟ آيا ميللي حركاتين سيرالاريندا تورانچي و ايرانچي و بو كيمي قووه­لره قارشي ايري حجيملي يازيلاردا حتي بير سيتات گتيرمه­دن، ساچمه­اي هجوملار تشكيل ائتمك اولار؟ (باخين صالح ايلديريم، 10-جي مقاله، 11-جي مقاله، و سيروس مددي، 2-جي مقاله)

4. آيا ايران ايسلام جومهوريتي­نين تانينميش ايدئولوژي، سياست و تبليغاتيلا سرحدلري پوزماق اولار؟ آيا ميثال اوچون 2009-جي ايل عاشورا گونو تهرانين خيابانلاريندا ياشيل آدلانان رژيم موخاليفلريني حسين شريعتمداري­نين كيهانيلا سس-سسه وئريب، مسلمانلارين مقدس كيتابيني يانديرماغا متهم ائتمك اولار؟ آيا آذربايجان ميللي فعالي كيمي آنداماند ائتمك اولار كي: "صحبت از تغيير نظام يا قانون اساسي نيست" و "مطالبات آذربايجانيها" ائله "رسيدن به جامعه دموكراتيك با حفظ ارزشهاي اسلامي" دير؟ (باخين باي بك 14-جي مقاله و مناف سببي 1-جي مقاله)

5. آيا قوزئي آذربايجان جومهوريتي­نين اسرائيل و آمئريكا ايله عادي ديپلماتيك و سياسي علاقه­لريني دائم ذره­بين آلتيندا ساخلاييب، بو موناسيبتلري "ايفشا" ائتمك، ميللي حركاتين ايشي اولا بيلر؟ آيا توركيه­ني خائن و قوزئي آذربايجاني، آذربايجانين دوشمني آدلانديرماق اولار؟ (باخين باي بك، سيروس مددي و علي رضا نظمي دن موختليف مقاله­لره)

6. آيا حركاتين سيراسيندا چاليشان ميللي فعال­لار و ميللي شخصيتلريميزين نئچه يوزونو بيرليكده، آشاغيداكي ياراماز لقب­لرله آدلانديرماق اولار؟

ساتقينلار
ايرانچيلار
يالانچي­لار
ميللي دون گئييب، اؤزونو آذربايجانچي گؤسترنلر
اونلارين گؤزو فارسين گؤزودور
فارس حاكيميتينه قوربان وئرنلر
آذربايجانا دوشمان
آذربايجانلي­لارا خيانت ائدنلر
چيركين ماهيتلريني گيزلدنلر
كومونيستلر و جبهه ملي نين حركته سوخولموش آداملاري
كومونيست زيبيل لري
كومونيستلرين ميللي حركته يئرلشديردي­يي جاسوسلاري
نفوذي قوه­لر
فارس دؤولتيندن حاق ديلنچي­ليك ائدنلر
آذربايجان ميللي حركتينه خائن
فارس شوينيزمي­نين موفته نؤكرلري و موفته حامبالي
ايچيميزه سيزان خائنلر
آذربايجان شهيدلرينه اهانت ائدنلر
اونلار اوچون دموكراسي مبارزه­سي فارسستان­دان باشلايير
شهيدلريميزي اراذل و اوباش گؤرنلر
فارس قويروقلاري
فارس عاميل­لري
پرده آرخاسيندا موسويله آنلاشان عاميل لر
كومونيستلرله پرده آرخاسيندا گؤروشوب، اونلارا نيگران اولمايين بيز بونلاري يئرلرينده اوتورداريق ديينلر
ياشيل قويروغو
بيز بونلاري سورتوب و مهو ائده­جييك
و سايير.

(باخين صالح ايلديريم حاقيندا 10-جي مقاله و 11-جي مقاله،)

7. آيا 28 آپريل 1920 تاريخينده آذربايجان خالق جومهوريتي­نين سرگئي ميرونوويچ كيروفون لئنين­ين بيرباشا و شخصي امريله، 11-جي قيزيل اوردونون باشيندا، قان ايچينده بوغولماسيني، توركيه جومهوريتي­نين حئسابينا يازماق اولار؟ آيا 1990-جي ايلين 20 يانوارينا كئچن گئجه، باكي­يا تانك و زرهلي قوشونولا باسقين ائديب، سيلاحسيز اهالي­ني قتل­عام ائتمه­ني خالق جبهه­سي­نين حئسابينا يازماق اولار؟
(باخين: صمد نيكنام و سيروس مددي­نين مختليف يازيلارينا)

8. آيا يوقوسلاويا فاجعه­لرينه سلوبودان ميلوسوويچ و رادووان كاراجيج­ين گؤزوايله باخماق اولار؟ آيا ميلوسوويچ رئژيمي­نين سرنگون اولماسينا ياس توتوب، بو ايشي "كودتاي ضد دولتي بر عليه دولتي قانوني" آدلانديرماق اولار؟ آيا بالكانين هيتلري ساييلان سلوبودان ميلوسوويچ­دن درين حؤرمت يوكو داشي­يان "دکتر سلابادان میلوشوویچ" لفظيله ياد ائتمك اولار؟ (باخين "نقل قول از سايت آقاي مددي و دوستانش" 15-جي قايناق)

  1. آيا بير طرفدن گونئي آذربايجانين ايستيقلاليتيندان ديفاع ائديب باشقا طرفدن ايران رئژيمي­له هئچ بير آيدين سرحد ساخلامايان ائلمنتلرله همكارليق و حتي اونلارا قارشي مديحه­نامه يازماق اولار؟ (باخين 14-جي قايناقدا ائلدار قاراداغلي­نين باي بك حاقيندا يازديغي مديحه كاراكتئرلي سؤزلرينه)

 

كشف و افشا قوطب­لري

اوخشار جهتلر:

  1. "ميكروكليما" يارادماق و اوزون مودت بو سياسي ميكلروكليمادا ياشاماق استعدادي.
  2. شوبهه يئرينه يقين و شك قارشي­سيندا ايماني سئومك.
  3. ميللي حركاتين داخيلينده دوشمن كشف ائديب، ايفشا ائتمه­يه چوخ مئيل­لي اولماق.

4. اؤز گوج و نفوذلاري حاقيندا كونترول ائتمه­سي موموكون اولمايان ايديعالار ايره­لي سورمك.

5. كونكرت­ليكدن قاچماق و ابهامي سئومك. كونكرت آداملارين و جريانلارين، سندلي و كونكرت عمللرين و فيكيرلرين تنقيد ائتمك يئرينه، هردم بير ايفشا كاراكتئرلي كامپانيالار يولا سالماق.

6. بو ايكي قوطبين بير-بيرلرينه سيمبيوزواري ائحتياجي، بير-بيرليري­نين قويروقلاريني اياقلاماقلاريني و عوضيه هر ايكي قوطبين حركاتين متن­ينه ساچمه­واري هجوملاري.

7. اونلاردان اوچونجو طرفلرين حيمايت و ايستيفاده­سي. هر ايكي طرف تورك دوشمنلري­نين سئويملي­لري­ديرلر: تورانچي كشف ائدنلرين اليله حركاتي لكه­لنديرمه­سي راحات باشا گلير و ايرانچي كشف ائدنلرين عقيل­دن اوزاق ايفراطي حركتلريني، حركاتين سيموولو نومونه­سي كيمي گؤسترمك اوچون ايستيفاده ائديرلر.

8. هر ايكي قوطب فرد يئرينه كوللكتيوي سئوير.

9. هر ايكي قوطب ساده­ليك سئوير، ساده منطيقدن حركت ائدير و دونياني آغ و قارا گؤرور. هر ايكي قوطب ميللي حركات اوچون اؤنم داشي­يان شخصيت يا تاريخي حاديثه­لري آغ و قارا پكيج كيمي گؤرور.(ميثال لار)

10. دوشمنه قارشي نيفرت دن ستايش.

11. كومپروميس و پراگماتيسمي خيانت آدلانديرماق، بؤيوك فتح و محتشم غلبه­يه سارسيلماز اينام.

12. فورماليسم. هر ايكي قوطب فورماليست­دير. اؤز گؤردوكلري ايشلر حاقيندا غيري رئال ايديعالار ائديب، اويدورما اوغورلار حاقيندا دانيشماقدا ذؤوق آليرلار. (ميثال: بير آچيق مكتوب دا 25 ايمضا "علي" و 20 "آراز" ايمضاسي واردير.)

13. پولميك­ده مستنطيق (بازجو) كيمي داورانماق. ائله مودعالار ايره­لي سورمك كي بيطرف مؤوقع­دن اونلاري كونترول ائتمك موموكون اولماسين.

14. كوبود ديل و ياناشما موناسيبتلري.

 

بير سيرا فرقلر:

ايرانچي كشف ائدنلر

تورانچي كشف ائدنلر

شيفاهي اولماق، فارس ديلينده اوخوماقدان ايمتيناع ائتمك و منيم خبريم اولان حال­لارين چوخوندا باشقا بير ديلده ده دوغرودوزگون يازيب اوخوماق باجارماماق. دونيا و مافيهادان خبرسيز اولماق

هئچ اولماسا بير حيصه­لري­نين كتبي عنعنه و عادتلري وار، فارسجا اوخوماقدان چكينميرلر، عوضينده بير بعدلي و دوگم­ديرلار، بونلارين دا شيفاهي آداملاري واردير كي، بير نئچه­سي پالتاكين دائمي و تقريبا هر گئجه­ليك مسكونلاري­ديرلار.

آقرئسسيو متدلار، هده قورخو گلمك و لازيم اولاندا تكفير ائتمك

مظلوم نماليق، پوپوليسم، و حق و عدالتدن دوزلميش بير پرده آخاسيندا گيزلنمك

اعتماد بنفس

كمونيسم ين آجي تاريخي تجروبه­لريندن شرم ائمك، و بو حاقدا ايمكان قدر سكوت ائديب، حنا مسئله­سيني ايمكان قدر آرايا آتميرلار

حركاتين داخيلينده " فكر پليسي" و فيكير اوطاغي يارادماق مئيل­لري.

بير قوروپ كيمي اؤز حاقلي و مشروع اومالاريني قبول ائتديرمه­يه جان آتماق.

دونيادا حاكيم اولان دمكراتيك نورملاردان خبرسيز اولماق و اينانيلماز بير حالدا غيري دمكراتيك مودعالار ايره­لي سورمك

دونيادا حاكيم اولان دمكراتيك ديرلردن خبردار اولماق، مددا اولمايان پرولتاريات ديكتاتوراسي و شورا حوكومتي كيمي غير پارلامنتاريستي اصول ايداره­نين آديني بئله چكمه­مك. (ميثال شالگوني)

آچيقجاسينا بي آبيرچي مودعالار ايره­لي سورمك و بارا قويماق.

زيركليكله، مودافيعه­سي مومكون اولان هر نه دن مودافيعه ائديب قالان اينامنلاري حاقيندا سوكوت ائتمك و لازيم گلنده باشقالاري­نين ديلينده دانيشماق. ميثال اوچون ايشاره اولان ميلوسوويچ­دن ديفاع ائتمك اؤز ايمضالاري يئرينه روسلاردان ترجومه و نشر اولموشدور.

سياسي تجروبه­سيزليك، تشكيلاتچي­ليقداب خبرسيزليك، ديسيپلينلي، جمعي و اوزون واده­لي ايشلري باجارماماق، مكرر انشعابلار (داك) چوخ واخت كنار قووه­نين رولو و حضورونو بير محلل كيمي ائحياجلاري اولماق. تشكيلات­دان آنلاييشلاري سياسي پروقرام و منتظم فعاليت يئرينه، هر ايك بير دفعه بير هتل­ده ضيافته ييغيشماق و غير رئال ايديعالار ايره­لي سورمه­يي آنلاييرلار

قائم بالذات و داراي توان بالقوه تشكل يابي، گرفتار انفعال عمومي نيروهاي چپ ايدئولوژيك

تشكيلاتچي­ليقدا تجروبه­لري اولسادا، برلين ديواري ييخيلاندان سونرا اؤزلرينه اينامي ايتيرمك و اوزون مدت كيچيك سكتلرده ياشاماغا اؤزلريني مجبور گؤرمك.

 

اوچونجود حاشيه: رئژيمين تبليغاتيلا آيدين بير سرحد ساخلامايانلار

پليسي بير رئژيمله اؤلوم-ديريم ساواشيندا اولان سياسي حركات اوچون اؤز كادرلاري و فعال­لاري­نين تهلوكه­سيز­لي­ييني قوروماق چوخ حياتي بير مسئله­دير. بوندان علاوه اؤز سياسي اراده­سيني بوگون حركاته سيزديرماق و يا گله­جكده بؤحرانلي شراييط ده، حركاتين يؤنونو ايسته­دي­يي طرفه دئيشديرمك مقصديله حركاتين سيرالاريندا آپاريجي فيقورلا اكمك باخيميندان دا، رئژيم چوخ ايشلره ال آتا بيلر. بوتون بونلار، بيزي آييق-ساييق اولماغا دعوت ائدير. بئله بير وضعيتده بير سيرا شخصلرين رئژيمله سينيرلاري پوزماق و ميللي حركاتيله رئژيمين ايدئولوژي و سياستلري آراسيندا بولانليق و دومانليق بير موناسيبت يارادماق، چوخ تهلوكه­لي ساييلا بيلر.

سون زامانلار خصوصيله قيرميزي بايراق اطرافيندا باش وئرميش موباحيثه­لردن يادگار قالميش آتموسفرده، بير سيرا شيفاهي مئديادا (اساسا پالتاك­دا) مسكلونلاشميش شيفاهي آداملار آچيق آشكارا رئژيمين شعارلاريني تكرار ائديب، هئچ بير قباحت دويمادان و دئديكلري­نين هئچ بير عاقيبتندن قورخمادان، رئژيمين آنتي آذربايجان شعارلاريني ياييرلار. حيس اولونور كي، قيرميزي بايراق اطرافيندا گئدن موباحيثه­لرده بيرطرفين عقلانيت­دن اوزاق متدلاري، او بيري طرفده رئژيمين ايدئولوژي و سياستي­نين تبليغينه سابقه­سي اولمايان بير تولرانس (دؤزوم) يارادميشدير. بوتون بونلار شيفاهي فورمادا اولدوغو اوچون اونلاردان سيتات گتيرمك آغير سندلشديرمه ايشي طلب ائدير. من الده اولان 2004-جي ايلده يازيلميش بير مقاله و باي باك سايتي­نين مسئولونون كتبي نشر ائتدي­يي فيكيرلردن بيرايكي نمونه گتيريريرم:

  1. "ايندي حتّی اگر اينانساق کي بو سيمگه ني ايران ااطلاعاتي اؤنريب، و اونون اتکيسينه اينانساق، ياني کي بير سيمگه نين گرکلي اولدوغون اطلاعات بيزدن داها تئز آنلاياراق اوندان سو استيفاده ائتمگه قالخيبديرسا، ائله قوي او سيمگه ني منيمسه يک! "
  2. که افراد و گروههاي دست پرورده بيگانه گوي سبقت را از فعالان واقعي حرکت نربايند و در پشت پرده معاملاتي به انجام نرسانند. ديدار برخي از افراد نام آشناي حرکت ملي آذربايجان با افراد منسوب به لابي يهودي در آمريکا
  3. "عزادارلار و موخاليفت آراسيندادا چاتيشمالار باش وئريب. شخصي و دئولتي بينالار و ماشينلارا اود وودولوب. موسلمانلارين موقدس کيتابي موخاليفت ايچينده اولان شخصلر طرفيندن اودا چکيليب. خميني، خامنه اي و باشقا ايقتيدار يئتکيليلرين عکسي يانديريليب و خيياوانلاردا آدلارينا رنگ سپيليب. "
  4. "ياشيل هرکاتي اؤزونو موسلمانلاردان آييردي. بو گون اؤزلليکله ياشيل بايراق، بيلزيک، باش اؤرتوسو و حتّی بارماق باغلامالار موخاليفت يانليلاري طرفيندن قوللانيلمادي."
  5. "ميلتدن ايراق، دئموکراسيدن اوزاق ايليشکيلر: آذربايجان نوماينده هئيتي ايسرائيله گئدير"
  6. بو گون بيزيم درديميز دونيادا گئدن قلوبال سيياستدير. ايکيز کوله لري اؤزلري پارتلاتديلار، افقانيستانا سالديرديلار. .. عراقين ايشقال ائتمه سينه ايللر اؤنجه دن قرار وئرميشلر.

1-جي قايناق­دا آشاغي­داكي سيتات­لار مناف بي سببي­دن نقل اولونور:

1. "...با انگيزه احياي چنين حكومتي براي حفظ ارزشهاي ديني در حكومتهاي آتي و براي جلوگيري از اسلام زدائي تا حدي آشنائي و رضايت دارم."

2. "عده­اي از مخالفان نظام بر اين باور هستند كه فضاي سياسي نسبتا آزاد بعداز حكومت رفسنجاني فراورده مبارزات مستقيم نيروهاي اوپوزيسيون بوده است. اما نگارنده به چنين استدلالي معتقد نيست."

3. "استفاده از خشونت سياسي بخش عظيمي از فرهنگ و سنت ما را تشكيل ميدهد." و "تعداد كثيري از مردم ايران خشونت دولتي را از اعم از نوع خود بخشي از روش سياست بحساب مي­آورند"

4. مناف بي سببي "مطالبات آذربايجانيها" باشليغي آلتيندا يازير: "رسيدن به يك جامعه دمكراتيك با حفظ ارزشهاي اسلامي" و باشقا يئرده "صحبت از تغيير نظام و يا قانون اساسي نيست"

طبيعي كه سؤز بو ايكي نفرين افاضاتيلا بيتمير. خصوصيله شيفاهي مجازي مئديادا، ايران رئژيمي­نين آذربايجانا قارشي ايدئولوژي و سياستيني آچيق-آشكار دستله­ينلر موجوددور.

سيفاريش، توليد، مصرف

سياسي نظريه و سياسي يازيلارين يارانماسيلا، حياتدا تأثير بوراخماسي آراسيندا چوخ واختلار، هم زامان فرقي اولور و بونلارين آراسيندا خصوصي بير باغلار تاپماق چتين اولور. آمما حاشيه­لرين فعاليتلرينده هم اونلارين "استحصال" ائتديكلري "ماتريال" و مصرف پروسه­سيله هم يوخ سويه­سينده بير قيصا زمان اولور و هم بير سيرا باغلار يا گؤرونورلر يا حيسس اولونورلار. بو باخيمدان ايكي قوطب آراسيندا فرقلي مقاملار واردير:

ايرانچي كشف ائدن قطب اوچون معين حال­لاردا، ايجرا ائدنلرين سياسي آنلاييش­لاري­نين آشاغي سويه­سي ديقتي جلب ائدير. بونلار سانكي بيلميرلر كي، سياست خصوصيله اوپوزيسيون اوچون بير "اينام و اعتماد" قازانما پراسئسي­دير. بونلارين عقل­دن اوزاق فعاليت شيوه­لري اصلينده اينام­سيزليق ياردان­ديرلار. بونلار اينام يارادماق يئرينه هده-قورخو گلمك، ديل خشونتينه متوسل اولماغي مصلحت گؤرورلر. آمما آز ديقتله و خصوصيله داها دقيق خبرلري اولان قايناقلارا قولاق آسديقدا معلوم اولور كي بو "عنصر خودسر" آدلان ائلمنتلر، اصلينده چوخدا "خودسر" دئيل­لر و شاعير دئمشكن، "تابع امر ولا­دير"لار. (16-جي قايناق­دا شاعير اسماعيل جميلي­نين شعرينه باخين)

 

آيدين­دير كه خوخ گلمكله "اينام" و سايقي يوخ، قورخو يارادماق ايسترلر. معلوم اولاني بونلار بيلميرلر كي، قورخو يارادماق يالنيز پليسي رئژيملرين، اؤلوم و ايشكنجه­يه دايانان سونسوز خشونت دستگاهيلا يارانا بيلر و اگر يوتوب كليپلري يا سايير مئديا اورقانلاريندا خوخ گلمكله قورخو يارديب "نصرت بالرعب" تاكتيكاسيندا موفق اولماق اولسايدي، اوندا آذربايجانلي فعال­لار اولجه داها گوجلو و داها خشونتلي اولان فارس راسيسمي­نين مئديا اورقانلاري­نين خوخلارينا مقهور و مغلوب اولارديلار.

 

باشقا مسئله معين حال­لاردا تحقير كامپانيا­لاري­نين يولا دوشمه­لري­نين هانسي­سا سياسي كامپانيالارلا عيئني واختدا، پارالل و عئيني جهتده اولماسي­دير. بئله حال­لاردا "عنصر خودسر" آدلانلارين هانسي مركز ولايي­دن امر آلمالاري حاقدا جيدي ظن و گومان آرايا چيخير. سانكي "عنصر خودسر" اؤزونو "ولايت" گؤرن مركزين خيدمتينده دوران "قوه چماقيه"دير و هارا دئيرلر "وور!"، وورور و هارا دئيرلر "سور!"، سورور.

 

تورانچي كشف ائدنلرين فعاليتلرينده "سيفاريش، توليد و مصرف" پروسه­سيني ايزله­يركن گؤرسنير كي بوردا "سيفاريش-توليد" موناسيبتلرينه حاكيم اولان موركب­ليك ديقتي جلب ائدير. بو جماعتين ايرانچي كشف ائدن رقيب قطب­يندن فرقلي اولاراق، بوردا "تابع امر ولا" اولان "عنصر خودسر"دن فرقلي اولاراق، بيرباشا سيفاريش آلان ايجرائيه يا چماقيه قووه موناسيبتلري گؤزه چارپمير. بوردا استيفاده ائدن طرف حاكيم ميلت­ين راسيست نوماينده­لري اولدوغو اوچون، "نظام سلطه" قانونلاري، عمل ائديرلر. بوردا اؤز ميلتينه قارشي سيلاح گؤتورن هيندوستانلي بريتانيا عسگرلري، الجزايرلي و تونسلي فرانسا قوشونلاري، زيندانلاردا يارانان توابلار دسته­سي كيمي و جنوبي ويتناملي آمئريكا عسگرلري كيمي اؤز ميللت و مدنيتينه سيلاح قالديرانلار نادير وجودلار دئيل­لر و عكسينه بئله ائلمنتلر هر سويه­ده و هر قيمته مؤوجود اولورلار. ايستير رضازاده شفق اولسون، ايستير بابك اميرخسروي و ... (بو حاقدا باخين 17-جي مقاله­يه: تبعات نظام سلطه)

بو "بوللوق" سيفاريش وئرمه­ني بو معادله­دن حذف ائدير. بوردا "سيفاريش" لازيم دئيل. حاكيم ميللت بيلير كي اسيرلري آراسيندا اؤزونه حاكيم ميلتين گؤزوايله باخان اسيرلر آز دئيل­لر و آرخايينليقلا سويون قيراغيندا دوروب آخماقلاميش باليقلارين يولونو گؤزله­يير. اؤز مظلوم ميللتي­نين سيرالاريندا پانتورك و ايرقچي آرايان و جينايتكارلا قورباني آراسيندا "ايفراطچي­ليغا وارمادان اورتاق مؤوقع­ده" دورماقلا اؤزونه يئر و آد قازانماق ايسته­ينلر هميشه وارديرلار و بوردا آنتي­تورك زهرلي سيلاحلارا ائحتياجي اولان سيفاريش وئرمه­دن، فارس ولايت­ينده ذوب اولموشلاردان ايسته­دي­يي قدر ماتريال آلا بيلير.

ائوده خوروس چؤلده فره!

ساده دئسك، ايرانچي كشف ائدنلر اگر كونسكونت اولسالار، گره­ك فارس راسيسمي­نين هجوملاري قارشي­سيندا اؤن سنگرده اولسونلار. آمما بئله ديرمي؟ بو نئچه يوز آذربايجان ضيالي­سينا بير يئرده اهانت ائدنلر، رضا عنايت، پرويز ورجاوند، كوروش زعيم، ناصر كرمي و يوزلرله بو ايرقچي­لارين آذربايجان توركونه قارشي هجوملاري قارشي­سيندا بير قيصاجيق يادداشت گؤرن وارمي؟ هابئله 1918-1920-جي ايللرين آذربايجان خالئق جومهوريتي ، توركيه جومهوريتي و ايكينجي آذربايجان جومهوريتي­نه قارشي نيفرت كامپانياسي آپارانلارا قارشي نئجه؟

باشقا طرفدن دموكراسي و عدالت خئيرينه و افراطي حركتلره قارشي شعار وئرنلردن ده كونسكونت­ليك نامينه گؤزلنيلير كي، لومپنيزم و آقرسسيو داورانيشي فضيلت حئساب ائدنلره قارشي سسلريني قالديرسينلار. آمما بئله­ديرمي؟ ميللي حركاتين داخيلينده تورانچي كشف ائديب ايفشپا ائدنلرين، آذربايجانلي فعال­لار و ضيالي­لارا قارشي اهانت كامپانياسي آپارانلارا موناسيبتي نئجه اولموشدور؟

 

معلوم اولان بو ايكي قوطب­ين قهرمانلاري، ميللي حركاتين متن­ينه قارشي ساچمه­واري هجوملاريندا گوجلو و ايديعا ائتديكلري موخاليفلرينه قارشي يوموشاق حتي يوخ كيمي­ديرلر.

عرضي موناسيبتلر

ايكي متقابيل قوطبين موناسيبتلرينه ايشاره ائتديم. بس بو قوطبلرين، ايران رئژيميله فيكير ياخينليغي اولان حاشيه­ايله نه موناسيبتلري واردير؟ حركتين متن­ينه قارشي گويا اوردا تورانچي تاپميش سول تمايول­لي­لرين بو ايران ايسلام جومهوريتي فيكر قوهوملاريلا موناسيبتلري نئجه­دير؟

بو حاقدا يكي نوكته­يه ايشاره ائتمك اولار. اونلار (يعني تورانچي كشف ائدنلر) بوگونه كيمي ايران رئژيمي­نين فيكيرلري­نين ان به­آبيرچي تبليغاتچي­لارينا دا گولدن آغير بير سؤز دئمه­ميشلر.

باشقا نوكته سون واختلار ديقتي جلب ائدن، بو ديرناق آراسي سولچولارلا، ايران رئژيمي­نين مؤوقعيندن چيخيش ائدنلرين پالتاك عالمينده محبتلي موناسيبتلري­دير. بونلار قيرميزي بايراق آديلا ميللي حركاتدا يئني و اجباري بير "استاندارد" تحميل ائتمك كامپانياسيندان سونرا، گون آذ­تي­وي­يه قارشي نيفرت كامپانياسي آپارماقدا اورتاق بير مقصد تاپميشلار. چوخ معنالي بودور كي بو نامقدس اتحاد، گون آذ تي وي نين ان گوجلو و ان مؤثر رول اويناديغي دؤوره تصادوف ائدير.

بس باخاليم، آذربايجان ضيالي­لاريني كمونيست زيبيلي آدلانديران ايرانچي كشف ائدنلر بو ايران رئژيمي­نين فيكيرداشلارينا قارشي نئجه موناسيبت بسله­ييرلر؟

اول فارسجا فيكيرلريني نقل ائتدي­ييم بي­يه بسلنميش موناسيبتين چوخ ايستي اولدوغونو دئمه­لي­يم. آمما بو شيفاهي جماعتين بعضا نئچه سطير كتبي يازانلاريندان ائلدار قاراداغلي آدلي بيري­نين باي­بك سايتي حاقيندا قلمه آلديغي فيكيرلري سيتات گتيرمك چوخ معنالي و يئرينده اولاردي. ديقت ائدين بو سؤزلرين مؤلفي هر فورصتده اوزو و فيكيرنه بنزه­مه­ين آذربايجانلي­لاري ايرانچي دامغاسي آلتيندا هئچي بير اهانت­دن اسيرگه مه­ميشدير. سيتات:

"باي بک، دوغرودان-دوغرويا ان دوغروسونو ياپميشدير. چونکي، Baybak.com بير ميلتچي سيته دير. اونون آپاريجيسي جسور، ساغلام، دؤردگئن ايچينده يئرلشن بير گئنيش اورکلي اولوسچو سويداشدير. سؤزسوز کي، گئنيش اورکلي بير ميلتچي نين قورخماز، آرخاسي قاچماز، آچيق سؤزلو اولماسي دا گره کي ر.... . اونون ميلت اورگي واردير. اونون اوچون ميللي سيياستين پرده آرخاسي يوخدور. بئيينله-اورگين بيرگه آنلاميدير اونون وار اولوشو.... اونون وار اولوش فلسفه سي بوتون کؤله ليکلردن قورتولوشودور."ائلدار قاراداغلي۲۳/۰۹/۲۰۰۹"

بو موناسيبت يالنيز كتبي اولدوغو اوچون، نقلي مومكون­دور. اصلينده سون زامانلار اؤزلريني سولچو (تورانچي كشف ائدن) آدلانديران پالتاك اولدوزلاري، ايران رئژيميني آچيق –آشكار ديفاع ائدن ائلمنتلرلرله گؤزل موناسيبتلر و قارشيليقلي آنلاشيلمالار سرگي­لنديريرلر. باشقا طرفدن، ايرانچي آرايانلارين، گويا داخيلدن (؟) پالتاكا قوشولوب، همن ايران رئژيمي­له فيكير باخيميندان چوخ ياخين اولان ائلمنتلرله ساعاتلارلا بير آز ساي­دا ياشتيراكچي­سي اولان اوتاقدا اولاركن، هئچ بير پروبلم ياشاميرلار. ايسوئچ آذربايجان فدراسيونو ايداره هيئتي­نين تركيبلري­نين دئيشمه­لرينده ده ايرانچي كشف ائدنلرله، ايران رئژيمي­نه فيكير باخيميندان ياخين اولانلارين صميمي امكداشليقلارينا شاهيد اولموشوق.

 


قايناقلار:
آشاغيداكي اصلينده اؤتن ايللرو آيلاردا نشر اولموش پولميك مقاله­لرديرلر. من اينانيرام كي بو پولميك­لر واختيندا اولوب كچيبلر. يعني بو مؤوضع­لاردا اوچونجو طرف (موخاطبلر، آئودوتوريا) قضاوت ائتمه­سي اوچون مومكون اولان معلومات و استدلال وئريلميشدير و آرتيق ايش پولميك طرفلريندين اوچونجو طرفين قرارينا وئريلميشدير.

  1. علي رضا اردبيلي: مناف سببي و نوعي نگاه به فدراليسم
  2. علي رضا اردبيلي: توتاليتر ايدئولوگيا و دموكراتيك سياست، سيروس مددي­نين مقاله­سيني بهانه ائدركن.
  3. علي رضا اردبيلي: ناممكن كردن ديالوگ كتبي و شفاهي
  4. علي رضا اردبيلي: معناسيز هذيانلار يا معنالي سؤزلر؟
  5. علي رضا اردبيلي: صاحيبي معلوم اولمايان ايمضالار و آذربايجان ميللي آزادليق حركاتي
  6. علي رضا اردبيلي: فيكير موباحيثه سي و شخصيت ترورو
  7. علي رضا اردبيلي: عوموم ميللي قرارلار وٸرمك مٸكانيزملري و يئني بير بايراق يارادماق هوسينه دوشنلر
  8. علي رضا اردبيلي: منفي منم-منم­ليك مسابيقه­سي
  9. علي بي ملازاده­ايله علي رضا اردبيلي: دوازده سوآل از آقاي دكتر نظمي
  10. علي ملازاده: ميللي حركاتي لومپنيزيمدن قوروماق هامي نين بورجودور (صالح ايلديريم طرفيندن باش وئرميش لومپنيستي حركتلره تنقيد)
  11. علي ملازاده: عوذر بدتر از گناه (صالح ايلديريم طرفيندن باش وئرميش لومپنيستي حركتلره تنقيد)
  12. علي ملازاده: ميللي فعاليت موحيطلرينده چوماق، سٶز و قلم قولدورلاري (صمد نيكنام طرفيندن يازيلميش يازيلار حاقيندا)
  13. علي رضا اردبيلي: ادعا آمد دليل ادعا !
  14. ائلدار قاراداغلي­نين باي بك حاقيندا يازديغي مديحه كاراكتئرلي سؤزلرينه
  15. نقل قول از سايت آقاي مددي و دوستانش
  16. اسماعيل جميلي: تابع امر ولادير "عنصر خودسر" بوگون!
  17. علي رضا اردبيلي: تبعات نظام سلطه

 

در باره نویسنده:

علي رضا اردبيلي

آخرین مطالب علي رضا اردبيلي