تریبون

اٶزل / ويژه

آنا دیلیم
ناخیش ناخیش اینجه ایپک بئشیگینده
کئچمیشیمی قوناقلایان
دویغولارین دنیزینده

اینجی ده یرلر کروانین آغیرلایان
دونیالاری دونیاسیندا  سیغیشدیران
آنا دیلیم


دونه دونه وقتسیز سولان چیچکلری
تاریخ بویو نیسگیل اولان دیلکلری
یاشام اوچون هپ چیرپینان اوره کلری
گوی قورشاغی قانادیندا اوچوشدوران
تورپاق یاشدا سایالارین گؤزگوسونده
مین ایللرین ایزلرینی
گونوموزله باریشدیران
آنا دیلیم

 

 


اؤز ائوینده چاغریلمامیش قوناق اولان
اؤز ائلینین دوداغیندا
اؤز یوردوندا یاساق اولان
شیرین دیللی وفاسیزلار دوزاغیندا
قولو باغلی دوستاق اولان
دیلیم دیلیم پارچالانان
سپه له نن

قارانلیغی دئشیب  یاران
اولدوز اولان
درین ظلمت گئجه لری
وورغونلارین حسرت دولو گؤزلرینده
آیدینلیغا اومودلانان
آنالارین سئوگی یایان نفسیله
لایلا لاردا یلماز اولان
بئشیکلرده گوللو چیچکلی یاز اولان
گاه ساز اولان گاه سؤز اولان
آنا دیلیم


دار گؤز یابان قوللوقچولار
کین کدورت مزاریندا
کیملیکلرین سومسوننده
قوجا شرقه حوکوم سورن
آدیم سانیم تاپداناندا
اوتانمازلار یوخلوغومو کوی سالاندا
وارلیغیمین کئشیگینده اویاق اولان
اؤز ائلینه داغلار کیمی دایاق اولان
اویانیشا چراغ اولان
دایانیشا بایراق اولان
آنا دیلیم   آنادیلیم
                                           اسماعیل جمیلی

سئوگیلیلر گونودور                  

سئوگیلیلر گونودور
قیزیل گوللر سئوگی داشیر
سئوینج گؤزلرده آلیشیر
کوس دووارین سئوگی آشیر
کوسگون اولانلار باریشیر
سئونلره
سئومک سئویلمک یاراشیر

سئوگیلیلر گونودور
بیزیم تایدا سئوگی یاساق
سئوگی یولو درین دوزاق
سئوه نلرین یئری دوستاق
قامچی قاپاز چریل چیپلاق
سئوگیسیزلر جایناغیندا
اسیر   اسیر آنا تورپاق

سئوگیلیلر گونودور
دونیادا یاز
بیزیم تایدا شخته سزاق
قوشلار یورغون
گوللر سولغون
باغلار پوزغون
زمان دورغون
قارا قورخو چمبرینده
یاشام توتساق




سئوگیلیلر گونودور
بیزیم تایدا باغچالاری ساریب خزان
سوسغون سونا بولبوللرین اوره گی قان
ایچ ایچه دیر قفس ، زیندان
اوتانمازلار یارامازلار ائدیر جولان
دوغرولاری دوغرور یالان
کین کدورت غصه کدر دئییر قان قان

سئوگیلیلر گونودور
بیزیم تایدا سئوگی یاساق سئون توتستاق
سئوگیلیلر گونو یامان