آذربایجان پوئماسی	Azərbaycan Poeması
سن آذربايجان سؤيله ، نچون آذر به جان اولدون	Sən Azərbaycan söylə nəçün azər be can oldun?
اونوتدون اؤز درين دردين يادين دردين آلان اولدون	Unutdun öz dərin dərdin, yadın dərdin alan oldun
چتين گونلرده ايرانين بلاسيندا يانان اولدون	Çətin günlərdə İranın bəlasında yanan oldun
وئريب ائولاديني قوربان اؤزون يالقيز قالان اولدون	Verib evladıvı qurban, özün yalqız qalan oldun.
ياشيل يوردوم باهار ايكن نهدن سولدون خزان اولدون	Yaşıl yurdum, bahar ikən nədən soldun xəzan oldun
گئچن يوز ايلده يوزلر يول دؤيوشدون مين يارا گؤردون	Keçən yüz-ildə yüzlər yol döyüşdün min yara gördün
داياندين سينمادين ـ دؤزدون وفا ائتدين جفا گؤردون	Dayandın, sınmadın dözdün, vəfa etdin cəfa gördün
كيمين چكدين بلاسين سن همان يئردن بلا گؤردون	Kimin çəkdin bəlasın sən həman yerdən bəla gördün
سويولدون ، پاي بؤلوش اولدون ياد اللرله تالان اولدون	Soyuldun, pay-bölüş oldun yad əllərlə talan oldun
سن آذربايجان سؤيله نچون آذربجان اولدون	Sən Azərbaycan söylə nəçün azər be can oldun
دؤيوشدون ، دوشمنه غاليب گليب مشروطهني آلدين	Döyüşdün, düşmənə qalib gəlib meşrutəni aldın
قيزـ اوغلان قهرمانلارلا آدين ديلدن ديله سالدين	Qız-oğlan qəhrəmanlarla adın dildən-dilə saldın
سونوندا يادلارا اويدون الي بوش چارهسيز قالدين	Sonunda yadlara uydun, əli boş çarəsiz qaldın
بوتون ايرانه باش اولدون اؤزون باشسيز قالان اولدون	Bütün İranə baş oldun özun başsız qalan oldun
سن آذربايجان سؤيله نچون آذربجان اولدون	Sən Azərbaycan söylə nəçün azər be can oldun
ايگيد «ستار»يوين قبري اياق آلتيندا غوربتده	İyit Səttarıvın qebri əyaq altinda qürbətdə
آدي سردار ملي دور ولي بوش سؤزده صؤحبتده	Adı “Sərdari Milli” dir vəli bosh sözdə-söhbətdə
وطن قوينوندا ياتسايدي ياشاردي اوج عيزتّده	Vətən qoynunda yatsaydı yaşardı oci-izzətdə
ايناندين فيتنه كار يادي اؤزون قبرين قازان اولدون	İnandın fitnəkar yadi özün qəbrin qazan oldun
سن آذربايجان سؤيله نچون آذربجان اولدون	Sən Azərbaycan söylə nəçün azər be can oldun
ائديبدير پاي بؤلوش اؤزگهبه پايين اولوبدور چول	Edibdir pay-bölüş mərkəz sənin payın olubdur çul
مين ايللر شاه اولساندا ديلين باغلي اولوبسان قول	Min illər şah olsanda, dilin bağlı olubsan qul
نه يين يوخدور دئييم يوخدور قوي اولسون ائللرين يوخسول	Nəyin yoxdur, deyim yoxdur, qoy olsun ellərin yoxsul!
دويوردون اؤزگه لر قارنين ائوينده آج ياتان اولدون	Doyurdun özgələr qarnın evində ac-qalan oldun!
سن آذربايجان سؤيله نچون آذربجان اولدون	Sən Azərbaycan söylə nəçün azər be can oldun
سن اؤز فيكرينده اولسايدين بوگون بو گونده اولمازدين	Sən öz fikrinde olsaydın, bu gün bu gündə olmazdın
وفاسيز اؤزگهيه خاطير اؤزون مين درده سالمازدين	Vəfasız yadlara xatir, özün min dərdə salmazdın
«كوير»ين كندلري آباد ـ سن ويرانه قالمازدين	Kəvirin kəndlərin abad, sən viranə qalmazdın
گلنده هر جفا تيري بيرينجي سن نيشان اولدون	Gələndə hər cəfa tiri birinci sən nişan oldun
سن آذربايجان سؤيله نه چون آذربجان اولدون	Sən Azərbaycan söylə nəçün azər be can oldun
غازانخانلار سراييدين ـ قوجا شرقين چيراغيدين	Qazanxanlar sərayidin qoca şərqin çırağı idin
نيظاميلرـ فيضوليلرـ هونر علمين اوجاغيدين	Nizamilər, Fizulilər hünər-elmin çırağı idin
تمدنله ترقيله بيرينجي سن اياغيدين	Təməddünlə tərəqqilə birinci sən əyaq idin
يادا وئردين كهر آتين اؤزون آخسار چاپان اولدون	Yada verdin kəhər atın, özün axsar-çapan oldun!
سن آذربايجان سؤيله نچون آذر به جان اولدون	Sən Azərbaycan söylə nəçün azər be can oldun
گووهن ائولادينا آنجاق اؤزون قيل دردينه چاره	Güvən evladına ancaq, özün qıl dərdinə çarə
كؤنول وئرمه شكر ديللي هر آن اويناشلي ديلداره	Könül vermə şəkər dilli, hər an oynaşlı dildarə
فريلداقدير دئيه هر نه بوراخ گئتسين اوزو قاره	Fırıldaqdır desə hər nə burax getsin üzü qarə
جانين قويدون سؤزون اوسته بو يولدا امتحان اولدون	Canın qoydun sözün üstə bu yolda imtahan oldun
سن آذربايجان سؤيله نچون آذر به جان اولدون	Sən Azərbaycan söylə nəçün azər be can oldun
پريشان سئوگيلي يوردوم سنه قوربان غريب جانيم	Pərişan sevgili yurdum sənə qurban sevən canım
توكنمز وارليقيم سن سن سنينله وار آديم سانيم	Tükənməz varlığım sənsən sən ile var adım-sanım
اؤزون چون بير اؤزون گؤستر ديريلسين شؤهرتيم شانيم	Özün çün bir özün göstər, dirilsin şöhrətim-şanım
گليبدير آزادليقين عطري اوگون كي سن عيان اولدون	Gələr azadlığın ətri o gün ki, sən əyan oldun
سن آذربايجان بير ده بو خئير ايشده گومان اولدون	Sən Azərbaycan birdə bu xeyr işdə güman oldun